Վրաստանի նախագահը հանդես է եկել հայտարարությամբ՝ ՌԴ-ի և Աբխազիայի միջև կնքված համաձայնագրի վերաբերյալ

Վրաստանի նախագահ Գեորգի Մարգվելաշվիլին երկուշաբթի երեկոյան հանդես է եկել հատուկ հայտարարությամբ՝ Ռուսաստանի և Աբխազիայի դե ֆակտո իշխանությունների միջև համագործակցության մասին համաձայնագրի ստորագրման կապակցությամբ: Այս մասին հայտնել է newsgeorgia.ru-ն։

«Ռուսաստանի Դաշնության և օկուպացված Աբխազիայի միջև ստորագրված, այսպես կոչված, «Դաշինքի և ռազմավարական գործընկերության մասին» համաձայնագիրն իրենից ներկայացնում է քայլ, որն ուղղված է Վրաստանի տարածքի անեքսիային, որն էլ ավելի է բարդացնում իրավիճակը Հարավային Կովկասում և դեպի փակուղի է տանում Վրաստանի և Ռուսաստանի միջև հարաբերությունների կարգավորման գործընթացը և Աբխազիայի առաջ դնում է անլուծելի խնդիր»,- ասվում է հաղորդագրությունում:

Նախագահը նշում է, որ «այս քայլով ՌԴ-ն փորձում է արդեն Աբխազիան վերածել իր ռազմական, քաղաքական և սոցիալ-տնտեսական տարածքի»: Ինչպես նշվում է նախագահի հայտարարությունում, նման փաստաթղթի ստորագրումը «կոպտորեն խախտում է միջազգային իրավունքի նորմերը և պետությունների միջև հարաբերությունների քաղաքակիրթ պրակտիկան, Վրաստանին և միջազգային հանրությանը դնում լրացուցիչ խնդիրների առաջ»:

Միևնույն ժամանակ Մարգվելաշվիլին կոչ է անում միջազգային հանրությանը «համատեղ քայլեր ձեռնարկել անեքսիայի դեմ»:

«Մենք հնարավոր և ցանկալի ենք համարում միջազգային ֆորումի անցկացումը, որտեղ կմշակվեն ինչպես երկարաժամկետ մոտեցումներ նմանատիպ խնդիրների հանդեպ, այնպես էլ կոնկրետ միջոցներ ընդդեմ Եվրոպայում նոր ոչ լեգետիմ սահմաններ հաստատելուն: Այսօր մեզ անհրաժեշտ է միասնություն, ամրություն, խոհեմություն և անդադար աշխատանք՝ մեր պետականության դեմ տարվող ծայրահեղ վտանգավոր քաղաքականությանը դիմակայելու համար»,- նշել է Վրաստանի նախագահը: