Էբոլա տենդով վարակված առաջին իտալացին տեղափոխվել է Հռոմ

Էբոլա տենդով վարակված առաջին իտալացին նոյեմբերի 25-ի առավոտյան Իտալիայի ռազմաօդային ուժերի ինքնաթիռով հասցվել է Հռոմի Պարտիկա դի Մարե ռազմական օդանավակայան, այնտեղից շտապօգնության հատուկ մեքենայով տեղափոխվել է «Lazzaro Spallanzani» Ինֆեկցիոն հիվանդությունների ազգային ինստիտուտ, հաղորդում է «Արմենպրես»-ը՝ հղում անելով տեղական լրատվամիջոցներին:

Խոսքը բժշկի մասին է, որը Սիեռա Լեոնեում աշխատում էր իտալական Emergency հայտնի մարդասիրական կազմակերպության շարքերում, որի ներկայացուցիչները հայտարարել են, որ առայժմ չեն բացահայտելու իրենց աշխատակցի անձը: Հիվանդը տեղավորվել է «հատուկ անվտանգության» հատուկ սարքավորված պալատում:

Չնայած այն բանին, որ Իտալիայի իշխանություններն արդեն քանիցս հայտարարել են, որ նման պայմաններում Էբոլա վիրուսով վարակվելու հավանականությունը հավասար է զրոյի, մահացու վտանգավոր հիվանդության հանդեպ վախը բնակչության շրջանում ակներև է, նշում են տեղական ԶԼՄ-ները:

«Չի կարելի խուճապ ստեղծել: Հիվանդը ոչ մի շփում չի ունեցել ու չի ունենալու հասարական քաղաքացիների հետ: Նրանով զբաղվելու է միայն հատուկ պատրաստված անձնակազմը»,-այդ կապակցությամբ հայտարարել է Իտալիայի առողջապահության նախարար Բեատրիչե Լորենցին:

Սա Էբոլա տենդով վարակված հիվանդի բուժման արդեն 21-րդ դեպքն է Աֆրիկայի սահմաններից դուրս:

Առողջապահության համաշխարհային կազմակեպության տվյալներով՝ Էբոլա տենդի զոհերի թիվը հասել է 5420-ի, ընդամենը գրանցվել է վարակման ավելի քան 15 հազար դեպք: Տվյալները վերաբերում են ութ երկրի, որտեղ տարածվում է տենդը: Վարակման և մահվան դեպքերի ճնշող մեծամասնությունը բաժին է ընկնում երեք երկրների՝ Գվինեային, Լիբերիային և Սիեռա Լեոնեին, հաղորդել է ՌԻԱ Նովոստին: