Վրաստանի երկաթուղայիններն ընդհանուր գործադուլ են հայտարարել

«Վրաստանի երկաթուղի» բաժնետիրական ընկերության մեքենավարները, ուղեկցորդները և տեխնիկական անձնակազմը նոյեմբերի 26-ի առավոտից ընդհանուր անժամկետ գործադուլ են հայտարարել: Այդ մասին, ինչպես տեղեկացնում է «Արմենպրես»-ը, «Նովոստի Գրուզիային» հայտնել են «Երկաթուղայինների նոր արհմիությունում»: Գործադուլի պատճառ է դարձել երկաթուղու աշխատակիցների՝ 2015 թվականի սկզբին պլանավորված ատեստավորումը և աշխատավարձի նոր համակարգի սահմանումը: Երկաթուղու աշխատակիցներն զգուշանում են, որ նորամուծությունը կհանգեցնի մինչև 2 հազար աշխատողների աշխատավարձի նվազման:

«Երկաթուղայինների նոր արհմիությունը» վաղօրոք ներողություն է խնդրում երկաթուղու ուղևորներից և փոխադրող ընկերություններից հնարավոր անհարմարությունների համար: Հուսով ենք, որ հասարակությունը ըմբռնումով կվերաբերվի այն մարդկանց արդարացի պահանջներին, որոնք աշխատում են երկաթուղում և համերաշխություն կհայտնի մեզ»,- ասված է արհմիության հայտարարության մեջ:

Նախնական տեղեկատվության համաձայն՝ գործադուլն առավել ընդգրկուն կդառնա օրվա վերջին:

Նոյեմբերի 25-ին «Վրաստանի երկաթուղու» աշխատակիցները նախազգուշական ակցիա էին կազմակերպել երկաթուղու դեպարտամենտի մոտ և բանակցություններ վարել վարչակազմի հետ, որոնք ավարտվել են անարդյունք:

«Վրաստանի երկաթուղի» ԲԸ-ում աշխատանքի է տեղավորված 12 հազար 682 մարդ, որոնցից արհմիությունում հաշվառված են մոտավորապես 4,8 հազարը: