Հունաստանի հեռուստաալիքներն ու ռադիոկայանները 24-ժամյա գործադուլ են հայտարարել

Աշխարհ 26 Նոյեմբեր, 2014 22:37

Հունաստանի պետական հեռուստաալիքները և ռադիոկայանները հրաժարվել են նորություններ թողարկել և ուղիղ հեռարձակումներ իրականացնել կառավարության քաղաքականության դեմ բոլոր լրատվամիջոցների 24-ժամյա գործադուլի շրջանակներում: Հեռուստաալիքները հեռարձակում են միայն ֆիլմեր, գիտաճանաչողական և ժամանցային հաղորդումներ, իսկ ռադիոկայանները՝ երաժշտություն: Աթենքի լրատվական գործակալությունը լուրերի հաղորդումը դադարեցրել է տեղական ժամանակով ժամը 06:00-ից մինչև նոյեմբերի 27-ի ժամը 06:00-ն, տեղեկացնում է «Արմենպրես»-ը:

Չեն թարմացվում նաև լրատվական կայքերը:

«24-ժամյա համընդհանուր գործադուլի օրը չեն աշխատում բոլոր լրագրողները, որոնք պետական և մասնավոր սեկտորի, թերթերի, ռադիոյի, հեռուստատեսության և կայքերի աշխատակիցներ են: Լրագրողներից ոչ մեկը որևէ պատճառաբանությամբ չի ազատվում գործադուլին մասնակցելուց»,-ասված է Աթենքի օրաթերթերի խմբագիրների միության՝ ԶԼՄ-ների աշխատողների խոշորագույն արհմիության, հայտարարության մեջ:

Լրագրողների պահանջների թվում նշվում են՝ «կոլեկտիվ աշխատանքային պայմանագրերի պարտադիր կնքումը և անհատական պարտավորագրերի արգելումը, ԶԼՄ-ների բոլոր աշխատողների աշխատավարձի պատքերի վճարումը, ինչպես նաև 2013 թվականի հունիսին լուծարված Հունական ռադիոյի և հեռուստատեսության վերականգնումը»:

Լրագրողներն ակցիան անցկացնում են Հունաստանում համընդհանուր գործադուլի սկսվելուց մեկ օր առաջ, որը նշանակված է նոյեմբերի 27-ին: Ինչպես նշվում է հրապարակված հայտարարության մեջ, թերթերը, ռադիոն և հեռուստատեսությունը նոյեմբերի 27-ին տեղական ժամանակով ժամը 11-00-ից մինչև 14:00-ը նույնպես չեն աշխատելու, «որպեսզի զանգվածային լրատվամիջոցների բոլոր աշխատողները կարողանան մասնակցել այդ օրը պլանավորված ցույցերին», հաղորդել է ՏԱՍՍ-ը: