Վրաստանի և Լատվիայի նախագահներն անընդունելի են համարել ՌԴ-ի քաղաքականությունը

Վրաստանի նախագահ Գեորգի Մարգվելաշվիլին և Լատվիայի նրա պաշտոնակից Անդրիս Բերզինշը նոյեմբերի 26-ին Թբիլիսիում քննարկել են համագործակցության հարցեր, ինչպես նաև նշել Ռուսաստանի քաղաքականության անընդունելիությունը հարևան երկրների նկատմամբ, տեղեկացնում է «Արմենպրես»-ը՝ հղում անելով «Նովոստի Գրուզիա»-ին:

Լատվիայի պատվիրակությունը, որի կազմում են երկրի գործադիր իշխանության և գործարար-շրջանների ներկայացուցիչները, Թբիլիսի է ժամանել նոյեմբերի 25-ի ուշ երեկոյան: Այցի պաշտոնական մասն սկսվել է նոյեմբերի 26-ին նախագահական պալատում կայացած պաշտոնական ընդունելությամբ:

Զրույցի ընթացքում Մարգվելաշվիլին լատվիացի պաշտոնակցին շնորհակալություն է հայտնել Վրաստանի տարածքային ամբողջականությունն և ինքնիշխանությունը, ինչպես նաև վրացական տարածքների՝ Աբխազիայի և Ցխինվալի տարածաշրջանի անկախությունը չճանաչելու քաղաքականությունը պաշտպանելու համար: Արծարծվել են նաև տարածաշրջանային անվտանգության և Ուկրաինայի իրադրության հարցերը:

Վրաստանի և Լատիվիայի նախագահների հանդիպմանն ընդգծվել է, որ «հարևան երկրների նկատմամբ Ռուսաստանի քաղաքականությունն անընդունելի է»:

«Վրաստանի նախագահը նշել է, որ Լատվիայի նախագահի այցն էլ ավելի է կարևորվում այն կրիտիկական իրավիճակում, երբ Ռուսաստանի Դաշնությունն օկուպացված Աբխազիայի բռնակցման քայլ է ձեռնարկել»,-ասված է հաղորդագրության մեջ:

«Դեմ առ դեմ» ձևաչափով նախագահների հանդիպումից հետո տեղի է ունեցել ընդլայնված ձևաչափով հանդիպում երկու երկրների պատվիրակությունների մասնակցությամբ: Կողմերը քննարկել են համագործակցության հարցեր, ցանկություն է հայտնվել խորացնելու համագործակցությունը բիզնեսի, առևտրի, զբոսաշրջության, պաշտպանության և գյուղատնտեսության բնագավառներում: