Եվրոպայում ՆԱՏՕ-ի գլխավոր հրամանատարը Կիևում քննարկել է ռազմատեխնիկական համագործակցությունը

Ուկրաինայի նախարարների կաբինետի ղեկավար Արսենի Յացենյուկը և Եվրոպայում ՆԱՏՕ-ի միվորված զինված ուժերի գերագույն գլխավոր հրամանատար գեներալ Ֆիլիպ Բրիդլավը նոյեմբերի 26-ին Կիևում կայացած հանդիպման ժամանակ քննարկել են Ուկրաինայում ստեղծված ռազմաքաղաքական իրադրությունը և պրոֆիլային համագործակցության ասպեկտները:

Այդ մասին, ինչպես տեղեկացնում է «Արմենպրես»-ը, հայտնել է Ուկրաինայի կառավարության մամուլի ծառայությանը:

«Հանդիպման ընթացքում խոսվել է ռազմատեխնիկական համագործակցության և Ուկրաինայի պաշտպանության ոլորտում բարեփոխումների իրականացմանն աջակցելու մասին»,-նշել են մամուլի ծառայությունում:

Յացենյուկը հերթական անգամ հաստատել է, որ Կիևը պատրաստ է ընդլայնել համագործակցության ձևաչափը: Իր հերթին Բրիդլավը բարձր գնահատական է տվել ուկրաինաամերիկյան համագործակցությանը ռազմատեխնիկական բնագավառում:

Ավելի վաղ Պենտագոնի մամուլի քարտուղար Ջոն Քիրբին հայտարարել է, որ Միացյալ Նահանգները մտադիր չէ մահաբեր զենք մատակարարել Ուկրաինային, և որ այս առնչությամբ Սպիտակ տան դիրքորոշումը մնում է նախկինը:

«Մենք շարունակում ենք ուսումնասիրել ռազմական օգնության վերաբերյալ Ուկրաինայի բոլոր խնդրանքները, բայց այժմ մենք կենտրոնացած ենք ոչ մահաբեր զենքի մատակարարումների վրա»,- ասել է Քիրբին: Ներկայում ԱՄՆ-ը պաշտոնապես Ուկրաինայի բանակին մատակարարում է զրահաբաճկոնակներ, գիշերային տեսունակության սարքեր, կապի միջոցներ, ավտոմոբիլներ, պարեկային կատերներ, համազգեստ, դեղորայք: Անցյալ շաբաթ փոխնախագահ Ջոզեֆ Բայդենի՝ Կիև կատարած այցի ընթացքում նաև հայտարարվել է ականանետային անձնակազմերի հայտնաբերման համար Ուկրաինային ռադարների և «Համվի» բանակային ավտոմեքենաների հանձնման մասին, հաղորդել է ՏԱՍՍ-ը: