Էբոլա վիրուսի զոհերի թիվը գերազանցել է 5,6 հազարը. ԱՀԿ

Էբոլա վիրուսի բռնկման հետևանքով աշխարհում ավելի քան 5 հազար 600 մարդ է մահացել: Այդ մասին, ինչպես տեղեկացնում է «Արմենպրես»-ը, հաղորդել է Առողջապահության համաշխարհային կազմակերպությունը:

ՄԱԿ-ի առողջապահության գործակալությունը հաստատել է Էբոլա տենդով հիվանդանալու 15 հազար 935 դեպք: Վիրուսով վարակվելու կասկածներ են գրանցվել ութ երկրում: Դեպքերի մեծ մասը բաժին է ընկնում արևմտաաֆրիկյան երեք երկրների՝ Գվինեային, Լիբերիային և Սիեռա Լեոնեին:

2014 թվականին հիվանդության բռնկման պահից ի վեր մահացել է 5 հազար 689 մարդ: Ընդ որում Գվինեայում հիվանդության հետ կապված իրադրությունը կայունացել է: Լիբերիայում Էբոլա տենդի տարածումը դանդաղել է: Սիեռա Լեոնեում վիրուսով վարակվելու դեպքերը շատ են և կարող են աճել:

Միջազգային փորձագետներին դժվար է ներկայացնել վիրուսի տարածման ամբողջական պատկերը: Առավել տուժած գյուղերից մի քանիսը գտնվում են քաղաքային կենտրոններից մեծ հեռավորության վրա, և դրանց բնակիչները հրաժարվում են գնալ հիվանդանոցներ: ԱՄՆ-ի հիվանդությունների վերահսկման և կանխարգելման կենտրոնի մասնագետների կարծիքով՝ հիվանդացածների փաստական թիվը կարող է 2-4 անգամ գերազանցել գրանցվածների թվաքանակը, հաղորդել է «Ինտերֆաքս»-ը: