ԱՄՆ-ի հյուսիսարևելյան շրջանները հայտնվել են ուժգին ձնամրրիկի ճիրաններում

ԱՄՆ-ի հյուսիսարևելյան շրջաններում մոլեգնում է ուժգին ձնամրրիկը: Նյու Յորքի հարևան Նյու Ջերսիի նահանգի նահանգապետ Քրիս Քրիստին հայտարարել է արտակարգ դրության ռեժիմ սահմանելու մասին, տեղեկացնում է «Արմենպրես»-ը:

Ցուրտ ցիկլոնի ազդեցության տակ է գտնվում ԱՄՆ-ի գրեթե ողջ հյուսիսարևելյան ծովափը՝ Վաշինգտոնից մինչև Բոստոն:

Թաց ձնից էլեկտրահաղորդման գծերի կտրվելու հետևանքով առանց էլեկտրաէներգիայի են մնացել տասնյակ հազարավոր սպառողներ: Նյու Ջերսիի մի քանի քաղաքներում ձյան առատ տեղումների պատճառով փակվել են դպրոցները, իսկ պետական հիմնարկությունների աշխատակիցներին թույլատրել են տուն գնալ ավելի շուտ: Գրանցվել են բազմաթիվ ճանապարհատրանսպորտային պատահարներ:

Անբարենպաստ եղանակի պատճառով չեղյալ է հայտարարվել ավելի քան վեց հարյուր ավիաչվերթ: Խախտվել է մի շարք խոշոր օդանավակայանների, այդ թվում՝ Նյու Յորքի օդանավակայանների աշխատանքը:

Նյու Յորքում օդի ջերմաստիճանը մոտ մեկ աստիճան է, տեղում է թաց ձյուն: Օդերևութաբանները նախազգուշացրել են, որ ձնամրրիկի ընթացքում ԱՄՆ-ի խոշորագույն մեգապոլիսում կարող է տեղալ մոտավորապես տասը սանտիմետր ձյուն:

Կանխատեսումների համաձայն՝ ԱՄՆ-ի արևելյան ծովափը ցուրտ ցիկլոնի ազդեցության տակ կգտնվի ևս մի քանի օր, հաղորդել է ՏԱՍՍ-ը: