Google-ն աշխատում է ԱՄՆ-ի պետդեպարտամենտի համար. Ջուլիան Ասանժ

Ամերիկյան Google ընկերությունը փաստորեն աշխատում է ԱՄՆ-ի կառավարության՝ կոնկրետ պետդեպարտամենտի համար: Այս մերկացումները բովանդակում է WikiLeaks կազմակերպության հիմնադիր Ջուլիան Ասանժի գիրքը, որը լույս կտեսնի դեկտեմբերի 1-ին, տեղեկացնում է «Արմենպրես»-ը՝ հղում անելով իսպանական Publico.es առցանց-թերթը:

Թերթի տվյալների համաձայն՝ Ասանժն այդ եզրակացությանն է հանգել 2011 թվականի հունիսին Google-ի նախագահ Էրիկ Շմիդտի և ընկերության տնօրենների խորհրդի անդամ Ջարեդ Քոենի հետ կայացած հանդիպումից հետո: Ըստ Ասանժի՝ որոնիչի սեփականատեր ընկերությունը Հետաքննությունների համերկրային բյուրոյին և Կենտրոնական հետախուզական վարչությանը տարամադրում է Էլեկտրոնային փոստով իր օգտատերերի նամակագրությանը ծանոթանալու անսահմանափակ հնարավորություն: Նման հնարավորություն գերատեսչությունների աշխատակիցները կարող են ստանալ առանց դատախազության կարգադրագրի կամ դատարանի որոշման ցանկացած ոստիկանական տեղամասում, կարծում է WikiLeaks-ի հիմնադիրը:

Ինչպես հաղորդել է Publico-ն, «Google-ն ինչպես գտավ WikiLeaks-ը» գրքի շնորհանդեսը, որն իսպաներեն պատրաստել է Clave Intelectual հրատարակչությունը, տեղի կունենա դեկտեմբերի 3-ին Մադրիդում: Միջոցառման ժամանակ պլանավորվում է անցկացնել «կլոր սեղան» և համացանցով կապի սեանս իր իսկ Ասանժի հետ, որը պատրաստ է պատասխանելու բոլոր հարցերին և սպառիչ բացատրություններ տալու նոր մերկացումների կապակցությամբ:

Ասանժը երկու տարի է, ինչ չի հեռանում Լոնդոնում Էկվադորի դեսպանատան տարածքից: Ավստրալացուն ապաստան է տրամադրվել 2012 թվականին: Օրերս Էկվադորը երկարացրել է WikiLeaks-ի հիմնադրին ապաստանի տրամադրման ժամկետը:

Միացյալ Նահանգների կառավարությունը նրան կասկածում է լրտեսության մեջ, նա իր ինտերնետ-կայքով պետդեպարտամենտի գաղտնի փաստաթղթերի հրապարակման գործի ֆիգուրանտ է: Այս հանցագործության համար պատժի առավելագույն չափը մահապատիժն է, հաղորդել է ՏԱՍՍ-ը: