Թուրքական շրջադարձ. Եվրոպայից` Ռուսաստան

Ռուսաստանը հանդիսանում է Թուրքիայի գլխավոր ռազմավարական գործընկերը և մերձավորարևելյան տարածաշրջանում որպես առաջատար երկիր դիրքերն ամրապնդելու իր ձգտման մեջ կողմոնորոշվում է հատկապես դեպի ՌԴ և ոչ թե եվրոպական երկրներ:

Այս մասին, ինչպես հաղորդում է «Արմենպրես»-ը՝ վկայակոչելով «ՌԻԱ Նովոստի»-ն, հայտարարել է ՌԴ-ում Թուրքիայի դեսպան Այդըն Սեզգինը:

Այս հայտարարությունը Սեզգինն արել է Թաթարստանի ղեկավար Ռուստամ Միննիխանովի հետ ռուս և թուրք ձեռնարկատերերի մասնակցությամբ հանդիպման ժամանակ:

«Թուրքիան ձգտում է ռազմավարական առաջատար դառնալ մերձավորարևելյան տարածաշրջանում: Ռուսաստանի Դաշնության հետ հարաբերությունները պետք է բոլոր ոլորտներում կառուցվեն շատ ակտիվորեն: Այլապես հասնել այն քաղաքական նպատակներին, որոնք դրել են մեր քաղաքական առաջնորդները, շատ բարդ է: Շարվելով դեպի այդ նպատակը, առաջին հերթին մենք կողմնորոշվում ենք դեպի մեր հյուսիսային հարևանները՝ Ռուսաստանի Դաշնությունը, այլ ոչ թե եվրոպական երկրները: Դե, իհարկե, Ռուսաստանի Դաշնությունը մեզ համար հանդիսանում է գլխավոր ռազմավարական գործընկեր», -ասել է ն ա:

Թուրք դեսպանը նշել է, որ Ռուսաստանի և Թուրքիայի միջև պատմական և դիվանագիտական կապեր գոյություն ունեն շատ դարեր, և «այդ կապերը շատ ամուր են, և խզել դրանք անհնար է»:

Ընթացիկ պատմական պահը Սեզգինն անվանել է «յուրահատուկ», քանի որ այժմ ե՛ւ տնտեսական , ե՛ւ քաղաքական կապերը երկու երկրների միջև գտնվում են շատ բարձր մակարդակի վրա:

Շուրջ քսան տարի Եվրոպայի դռները թակող Թուրքիայի այս կտրուկ շրջադարձը դեպի հյուսիսային հարևան հիշեցնում է անցյալ դարասկզբին բոլշևիկյան Ռուսաստանից տնտեսական և քաղաքական օգուտներ քաղելու համար մի գիշերվա մեջ թուրքերի «կարմրելը»՝ բոլշևիկանալը: Պատմությունը ցույց տվեց, թե ինչ ավարտ ունեցավ դա: