Կալիֆորնիան ԱՄՆ-ի առաջատարն է դարձել մեծահարուստների թվով

Կալիֆորնիան ճանաչվել է ԱՄՆ-ի՝ առավել մեծ թվով գերհարուստ քաղաքացիներ (30 միլիոն դոլարից ավելի կարողությամբ) ունեցող նահանգը: Այդ մասին, ինչպես տեղեկացնում է «Արմենպրես»-ը, հաղորդել է MarketWatch-ը՝ վկայակոչելով Wealth-X կոնսալտինգային ֆիրմայի տվյալները:

«Ոսկե նահանգում» բնակվում են 13 հազար 445 այդպիսի քաղաքացիներ: Դա ավելին է, քան Մեծ Բրիտանիայում (11 հազար 510 մարդ): Այդ թիվն անցյալ տարվա համեմատությամբ աճել է 6 տոկոսով: Նահանգում առավել մեծ թվով գերհարուստ ամերիկացիներ են գրանցվել Սան Ֆրանցիսկոյում (5460) և Լոս Անջելեսում (5135):

ԱՄՆ-ում հարուստներով ամենախիտ բնակեցված քաղաք է ճանաչվել Նյու Յորքը. «Մեծ խնձորի» 8655 բնակիչներ 30 միլիոն դոլարից ավելի կարողության տեր են: Այդ ցուցանիշը Նյու Յորքի նահանգին թույլ է տվել վարկանիշում երկրորդ տեղն զբաղեցնել Կալիֆորնիայից հետո:

Մեծահարուստ բնակչության աճի առավելագույն տեմպեր են արձանագրվել Հյուսիսային Դակոտայում՝ տարեկան 14 տոկոս: Այդուամենայնիվ, հարուստների ընդհանուր թիվը նահանգում կազմել է ընդամենը 80 մարդ. նրանց մեծամասնության կարողությունն ստեղծվել է թերթաքարային նավթի արդյունահանումից: Ավելի քիչ մուլտիմելիոնատերեր են ապրում միայն Դելավերում (60) և Ալյասկայում (50):

Միացյալ Նահանգների ամենահարուստ մարդը՝ Microsoft-ի հիմնադիր Բիլ Գեյթսը, ապրում է Վաշինգտոնի նահանգում, հաղորդել է «Ինտերֆաքս»-ը: