Լոս Անջելեսի ոստիկանությունը Ֆերգյուսոնում բողոքների երեք օրվա ընթացքում 338 մարդ է ձերբակալել

Լոս Անջելեսում բողոքի ակցիաների երեք օրվա ընթացքում ձերբակալվել է 338 ցուցարար, որոնք հանդես էին գալիս Ֆերգյուսոնում (Միսուրիի նահանգ) անցած ամռանը անզեն 18-ամյա աֆրոամերիկացի Մայքլ Բրաունին գնդակահարած ոստիկան Դարեն Ուիլսոնին դատի չտալու երդվյալ ատենակալների ժյուրիի որոշման դեմ: Այդ մասին, ինչպես տեղեկացնում է «Արմենպրես»-ը, հայտնել են Լոս Անջելեսի ոստիկանական դեպարտամենտում:

Քաղաքի ստիկանապետ Չառլի Բեքը նոյեմբերի 27-ին որոշում է ընդունել Գոհաբանության օրվա կապակցությամբ ազատել ձերբակալվածների մի մասին: Խոսքը վերաբերում է նրանց, ովքեր ձերբակալվել էին ոստիկանության հրամաններին չենթարկվելու մեղադրանքով: Իսկ նրանք, ում կասկածում են կարգի պահապանների վրա հարձակումների և այլ լուրջ զանցանքների մեջ, կմնան ճաղերի հետևում:

The Los Angeles Times թերթի տվյալներով՝ ցուցարարներից շատերը հայտարարում են, որ քաղաքի ոստիկանությունը բռնել է նաև նրանց, ովքեր որևէ անօրինական գործողություն չեն կատարել: Ոմանք վկայում են, որ չեն լսել ցրվելու հրամանները, ընդսմին հանկարծակի հայտնվել են շրջապատման մեջ և ձերբակալվել:

Երեք օրվա ընթացքում Լոս Անջելեսի փողոցներ են դուրս եկել մի քանի հարյուր մարդ: Ցուցարարները փորձում էին արգելափակել ավտոմայրուղիները՝ խանգարելով ճանապարհային երթևեկությանը, պահանջում էին դատի տալ Ուիլսոնին, ինչպես նաև մյուս այն սպաներին, ովքեր անզեն մարդկանց են սպանել ԱՄՆ-ում:

Ոստիկանության հետ ցուցարարների բախումների հետևանքով վերքեր է ստացել սպաներից մեկը: Ներկայումս քաղաքի փողոցներում դրությունը հանգիստ, հաղորդել է ՏԱՍՍ-ը: