Նյու Յորքում օդապարիկների վիթխարի շքահանդես է տեղի ունեցել Գոհաբանության օրվա առթիվ

Ավելի քան 3 միլիոն մարդ էր դուրս եկել Նյու Յորքի կենտրոնական փողոցներ՝ տեսնելու Գոհաբանության օրվա առթիվ կազմակերպված գունագեղ շքահանդեսը: Այս շքերթը հռչակված է իր ավանդաբար վիթխարի օդապարիկներով՝ մուլտիպլիկացիոն ֆիլմերի, հեքիաթների, պատկերապատումների հայտնի հերոսների և այլ զվարճալի գործող անձանց կերպարանքներով, տեղեկացնում է «Արմենպրես»-ը:

Ընդամենը հանդիսականների գլխավերևով թռել են 16 հսկայական օդապարիկներ, դրանցից մի քանիսը եղել են հինգհարկանի շենքի չափ, և 33 ավելի փոքր օդապարիկներ: Ամեն տարի շքահանդեսին մասնակցում են նոր հերոսներ: Այս տարի առաջին անգամ դրան մասնակցել են հռչակավոր շոգեքարշիկ Թոմասը՝ «Թոմասը և ընկերները» մուլտֆիլմից, Փադինգթոն արջուկը՝ անգլիացի գրող Մայքլ Բոնդի գրքի հերոսը և Կարմիր ռեյնջերը՝ «Հզոր ռեյնջերները» հեռուստասերիալից: Նյու Յորքում ցուրտ ու ամպամած եղանակ էր, սակայն դա չի փչացրել հանդիսականների տրամադրությունը:

Շքերթին մասնակցել են ոչ միայն օդապարիկները: Հանդիսականների տրամադրությունը բարձրացրել են նաև նվագախմբերը, որոնք ժամանել էին տարբեր երկրի անկյուններից, ծաղրածուները, ակրոբատները և նույնիսկ հայտնի երաժիշտները:

Երեք ժամ տևած շքերթը դիտել են ոչ միայն մերձակայքում գտնվող մարդիկ, այլև շուրջ 50 միլիոն հեռուստադիտողներ ԱՄՆ-ի ամբողջ տարածքում: Շքերթի եզրափակիչ փուլում հայտնվել է Սանտա Կլաուսը՝ խորհրդանշելով Ծննդյան տոների սեզոնի սկիզբը, որը մեկնարկում է Գոհաբանության օրվանից անմիջապես հետո, հաղորդել է ՏԱՍՍ-ը: