ԻԼԻՊ-ը մոտեցել է Ադրբեջանի հյուսիսային սահմանին

Իրաքի և Սիրիայի զավթած տարածքներում «Իսլամական պետություն' խալիֆայություն» հռչակած «Իրաքի և Լևանտի իսլամական պետություն» (ԻԼԻՊ) ահաբեկչական խմբավորման բջիջները հյուսիսում ընդհուպ մոտեցել են Ադրբեջանի սահմանին:

Ինչպես հաղորդում է «Արմենպրես»-ը, Bloomberg գործակալությունը գրում է, որ Դաղստանում գործող արմատական իսլամիստ մարտիկների առաջնորդ «ամիր Սուլեյմանը» համացանցում տարածված տեսադիմումում իր ջոկատի հետ հավատարմության երդում է տալիս ԻԼԻՊ-ի առաջնորդ Աբու Բաքր ալ Բաղդադիին, և հայտարարում, որ իր ղեկավարած ջոկատն ու համայնքն այսուհետև մտնում են «Իսլամական պետության» կազմ:

Bloomberg-ը «ամիր Սուլեյմանի» դիմումն անվանում է խիստ վտանգավոր երևույթ և հիշեցնում, որ ԻԼԻՊ-ի շարքերում ներկայումս կռվում է 300-ից ավելի դաղստանցի, որոնց մի մասն արդեն վերադարձել են հայրենիք և մարտերի բռնվել ռուսաստանյան դաշնային զորքերի հետ:

ՌԴ Պետդումայի պաշտպանության հանձնաժողովի փոխնախագահ Ֆրանց Կլինցևիչը, մեկնաբանելով այդ տեղեկատվությունը, տեղի ունեցածն անվանել է «Կովկասում «Իսլամական պետություն» անվան տակ քաղցկեղային ուռուցքի տարածման սկիզբ»: Գործակալությունը հիշեցնում է, որ Դաղստանը սահմանակից է Ադրբեջանին և Չեչնիային, ինչը մեծացնում է ահաբեկչական վտանգի տարածման ռիսկը:

Ենթադրվում է, որ «ամիր Սուլեյմանի խմբավորումը» երես է թեքել «Կովկասի ամիրայությունից» և աջակցություն է խնդրում «Իսլամական պետությունից»: Հակահաբեկչական փորձագետները գտնում են, որ օգտվելով դաղստանցի «ամիրի» հավատարմությունից, «Իսլամական պետությունն» աշխատելու է ուժեղանալ Հյուսիսային Կովկասում:

ԻԼԻՊ-ը պայքարում է 6-9 դարերի տիպի իսլամական խալիֆայություն ստեղծելու համար: Ահաբեկչական կազմակերպության գաղափարախոսների կողմից պատրաստված քարտեզում այդ երևակայական պետության կազմ է մտցված նաև Ադրբեջանը:

Անդրադառնալով թեմային' «Ազադլըգ» թերթը գրում է, որ Ադրբեջանի իշխանությունների կողմից տարվող բռնաճնշումների քաղաքականությունը երկիրը տանում է արմատականացման, ինչն էլ պարարտ հող է հանդիսանում ԻԼԻՊ-ի' այդտեղ հայտնվելու համար:

Հայտնի է, որ Սիրիայում և Իրաքում ԻԼԻՊ-ի կազմում կռվում են մեծ թվով Ադրբեջանի քաղաքացիներ ևս: Որոշ դիտորդների կարծիքով' Սիրիայում օրեցօր ահագնացող բախումները հնարավոր է ապագայում ներթափանցեն նաև Ադրբեջան: Միջազգային փորձագետների կարծիքով' Ադրբեջանի համար ամենալուրջ սպառնալիքներից մեկը կրոնական հողի վրա ծայրահեղական հոգեվիճակի ուժեղացումն է: Նրանք գտնում են, որ իսլամիստական խմբավորումների ադրբեջանցի մարտիկների' Սիրիայից Ադրբեջան վերադարձը կարող է պատճառ դառնալ երկրում ներքին կայունության կտրուկ խախտման և ահաբեկչական գործողությունների աճի համար: