Լե Պենը ԵՄ-ից դուրս գալու հանրաքվե է խոստանում նախագահ դառնալու դեպքում

Եվրախորհրդարանի պատգամավոր, «Ազգային ճակատ» կուսակցության առաջնորդ Մարին Լե Պենը հայտարարել է, որ Եվրամիությունից Ֆրանսիայի դուրս գալու շուրջ հանրաքվե կանցկացնի, եթե շահի 2017 թվականի նախագահական ընտրություններում: Այդ մասին, ինչպես տեղեկացնում է «Արմենպրես»-ը, հաղորդել է Le Figaro թերթը:

«Եթե ես ընտրվեմ Հանրապետության նախագահ, ֆրանսիացիների առջև պարտավորություն կստանձնեմ՝ վեց ամսից հանրաքվե կազմակերպել Եվրամիությունից դուրս գալու շուրջ»,- ասել է Լե Պենը:

Պատգամավորը նշել է, որ վեց ամսվա ընթացքում ինքը պատրաստվում է եվրոպական մարմինների հետ պայմանավորվել Ֆրանսիային տարածքային, օրենսդրական, տնտեսական ինքնիշխանության, ինչպես նաև արժութային ոլորտում ինքնիշխանությունը վերադարձնելու շուրջ: «Դրանից հետո կամ ԵՄ-ն Ֆրանսիայի ժողովրդին վերադարձնում է այս չորս բաղադրիչները, կամ նա հրաժարվում է, և այդժամ ես կխնդրեմ ֆրանսիացիներին՝ հանրաքվեում քվեարկել ԵՄ-ից դուրս գալու օգտին»,- հավելել է պատգամավորը:

«Ազգային ճակատի» առաջնորդը նշել է, որ կթողնի նախագահի պաշտոնը, եթե ֆրանսիացիները դեմ քվեարկեն ԵՄ-ի կազմից հանրապետույթան դուրս գալուն:

«Եթե ֆրանսիացիները դեմ քվեարկեն ԵՄ-ից դուրս գալուն, ես կհեռանամ, քանի որ երբեք նրանց չեն տա այնպիսի խոստում, որը չեն կարող կատարել: Ես ցանկանում եմ նրանց պարզորոշ ասել, որ ոչինչ չի կարող փոխվել, եթե մենք չվերականգնենք մեր ճակատագրի տերը լինելու ազատությունը»,- ասել է Լե Պենը, հաղորդել է ՌԻԱ «Նովոստին»: