Հռոմի պապը Թուրքիայում ընդգծել է տարբեր կրոնների ներկայացուցիչների իրավահավասարության կարևորությունը

Հռոմի Ֆրանցիսկոս պապը Թուրքիա կատարած այցի ժամանակ ընդգծել է երկրում մուսուլմանների, քրիստոնյաների և հրեաների իրավահավասարության կարևորությունը: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը:

«Մենք երկխոսության կարիք ունենք, քանի որ համատեղ շատ տարրեր և արժեքներ ունենք: Անհրաժեշտ է ջանքեր գործադրել հանուն ամուր խաղաղության: Այս ամենն իրականացնելու համար Թուրքիայի մուսուլման, հրեա և քրիստոնյա քաղաքացիներն օրենքի շրջանակներում պետք է միևնույն իրավունքների տերը լինեն և նույն պարտականություններն իրականացնեն: Նման ձևով ամեն անգամ թյուրըմբռնումներից հնարավոր կլինի հեռու մնալ: Բարեկամությունն այսպես կարող է զարգանալ»,- Էրդողանի հետ հանդիպումից հետո լրագրողների հետ զրույցում ասել է Հռոմի Ֆրանցիսկոս պապը:

Նա խոսել է Իրաքում և Սիրիայում ահաբեկչական գործողությունների մասին' իր խորը վշտակցությունը հայտնելով այնտեղ հարյուր հազարավոր մարդկանց, մասնավորապես քրիստոնյաների և եզդիների մահվան առնչությամբ: Ֆարնցիսկոսն ընդգծել է, որ խնդրի լուծման համար միայն ռազմական ջանքերը բավական չեն, և անհրաժեշտ է քայլեր ձեռնարկել համընդհանուր անվտանգության մթնոլորտ ստեղծելու նպատակով:

Հռոմի պապը Թուրքիա է ժամանել նոյեմբերի 28-ին: Ֆրանցիսկոսի ինքնաթիռը ժամանել է Անկարայի «Էսենբողա» օդանավակայան: Մայրաքաղաքում նա այցելել է Աթաթուրքի դամբարան, հանդիպումներ ունեցել Նախագահ Ռեջեփ Թայիփ Էրդողանի, ինչպես նաև Կրոնական գործերի նախարարի հետ: Նոյեմբերի 29-ին Ֆրանցիսկոսը կմեկնի Ստամբուլ:

Հռոմի պապի այցի ընթացքում աշխատանքի մեջ կլինի շուրջ 2700 ոստիկան: Նրանցից հազարը կհսկեն այն փողոցները, որոնցով անցնելու է Ֆրանցիսկոս պապը: Անկարայի դատարանը իրավապահ մարմիններին նաև թույլատրել է բոլոր վերոնշյալ փողոցներում զննել կասկածելի թվացող անձանց: Ֆրանցիսկոսի այցը կլուսաբանի 900 հավատարմագրված լրագրող:

Հռոմի պապի այցելությունը կայանում է Պոլսո Հունաց տիեզերական պատրիարք Բարդուղիմեոսի հրավերով: Ֆրանցիսկոսն ու Բարդուղիմեոսը նոյեմբերի 30-ին Ստամբուլում միասին պատարագ կմատուցեն: Կաթոլիկ աշխարհի հոգևոր առաջնորդ Ֆրանցիսկոսը կլինի Հռոմի չորրորդ պապը, ով այցելում է Թուրքիա: