Մոլդովայում կայացած խորհրդարանական ընտրությունները պառակտել են երկրի բնակչությանը

Մոլդովայում նոյեմբերի 30-ին կայացած խորհրդարանական ընտրությունների նախնական արդյունքները վկայում են այն մասին, որ հանրապետության բնակչությունը պառակտված է եվրոպամետ և ռուսամետ կուսակցությունների միջև: Այդուհանդերձ, ոչ մեծ առավելություն ունեն եվրոպական ընտրության կողմնակիցները, տեղեկացնում է «Արմենպրես»-ը՝ հղում անելով BBC-ին:

85 տոկոս արձանագրությունների տվյալների ամփոփումից հետո եվրոպամետ երեք կուսակցություններ համատեղ հավակնում են 54 մանդատի, ինչը խորհրդարանի տեղերի կեսից ավելի է: Բայց, ինչպես ընդգծում են դիտորդները, շատ բան կախված կլինի այն բանից, թե եվրոպամետ կուսակցություններն ինչպես կկարողանան կոալիցիա կազմել:

Մինչ այդ ընտրությունների առաջատարը ռուսամետ Սոցիալիստների կուսակցությունն է՝ ձայների 21,53 տոկոսով: Երկրորդ տեղում Լիբերալ-դեմոկրատական կուսակցությունն է, որը հավաքում է ձայների 19,27 տոկոսը: Կոմունիստների կուսակցությունը՝ Մոլդովայի նախկին նախագահ Վլադիմիր Վորոնինի գլխավորությամբ, ստանում է ձայների 17,85 տոկոսը:

Ընտրողների ձայների առնվազն 6 տոկոսը հավաքած կուսակցությունները տեղեր կստանան հանրապետության 101-տեղանոց միամանդատ խորհրդարանում:

Մոլդովայի լիբերալ-դեմոկրատական կուսակցության առաջնորդ, նախկին վարչապետ Վլադիմիր Ֆիլատը հանդես է եկել երկրի եվրոպական ուղեգիծը շարունակելու օգտին: «Մենք բոլորս շատ դժվարին փորձություն անցանք: Մոլդովան այսուհետև էլ պետք է մնա անկախ երկիր՝ շարունակելով իր եվրոպական ուղին»,- ասել է նա:

Ընտրություններին մասնակցությունը կազմել է 55,86 տոկոս: 2010 թվականի նոյեմբերին կայացած նախորդ ընտրություններում մասնակցությունը շատ ավելի բարձր է եղել՝ 63,37 տոկոս: