Հռոմի պապը պատրաստվում է հանդիպել Ռուս ուղղափառ եկեղեցու ղեկավարի հետ

Հռոմի Ֆրանցիսկոս պապը մեծ հարգանքով է վերաբերվում Ռուս ուղղափառ եկեղեցուն ու նրա հոգևոր ավանդույթներին: Այս հայտարարությունը, ինչպես տեղեկացնում է «Արմենպրես»-ը, քահանայապետն արել է Ստամբուլից Հռոմ մեկնող հատուկ ինքնաթիռում ՏԱՍՍ-ին տված հարցազրույցում:

«Մենք Մոսկվայի և համայն Ռուսիո պատրիարք Կիրիլի հետ ցանկանում ենք հանդիպում անցկացնել, երկուսս էլ պատրաստվում ենք դրան: Մենք այդ ուղղությամբ շարժվում ենք պատասխանատվության զգացումով և բարի կամքով, բոլոր խոչընդոտները վերացնելու մտադրությամբ»,- ընդգծել է Հռոմի պապը:

Գնահատելով Անկարա և Ստամբուլ իր այցի և Կոստանդնուպոլսի պատրիարք Բարդուղիմեոս Առաջինի հետ «եղբայրական շփման» արդյունքները, Ֆրանցիսկոս պապը կարևորել է քրիստոնեական միասնությունն արդի աշխարհում և դրանում ուղղափառության դերը:

Հովվապետը Հռոմ է վերադարձել նոյեմբերի 30-ին, նրա ինքնաթիռը Թուրքիա եռօրյա առաքելական այցից հետո վայրէջք է կատարել Չամպինո օդանավակայանում: Ուղևորության ընթացքում նա բանակցություններ է վարել Թուրքիայի նախագահ Ռեջեփ Թայիփ Էրդողանի հետ և հանդիպում է ունեցել Կոստանդնուպոլսի պատրիարքի հետ: Այցի արդյունքներով ընդունված համատեղ հայտարարության մեջ դատապարտվել են ահաբեկչությունը, պատերազմը, բռնություններն ու քրիստոնյաների հալածանքները:

Հռոմի պապը և տիեզերական պատրիարք Բարդուղիմեոսը խաղաղության կոչ են արել Ուկրաինայում: Համատեղ հայտարարության մեջ նրանք դիմել են հակամարտության կողմերին՝ խնդրելով երկխոսություն վարել և հարգել միջազգային իրավունքը, հաղորդել է ՏԱՍՍ-ը: