Դանիայում EV-D68 գրիպի վիրուս է հայտնաբերվել, որը հանգեցնում է անդամալուծության

EV-D68 անվանմամբ հայտնի գրիպի, որով ավելի քան 1100 մարդ է ախտահարվել ԱՄՆ-ում, վիրուս է հայտնաբերվել Դանիայում, տեղեկացնում է «Արմենպրես»-ը՝ հղում անելով ՏՎ2 հեռուստաալիքին:

Պատվաստանյութերի պետական ինստիտուտի (State Serum Institute) գլխավոր բժիշկ Տեա Կոլսեն Ֆիշերը հավաստել է, որ Դանիայում գտնվող մի տղա, ով ժամանել է Ֆրանսիայից, վարակվել է այդ վիրուսով, որը հանգեցրել է անդամալուծության և շնչառության դժվարությունների, այնպես որ նրա համար թոքերի արհեստական օդափոխություն է պահանջվել:

«Հիվանդությունը, գլխավորապես, գրոհում է երեխաների վրա, որովհետև չափահասները կյանքի ընթացքում գործ են ունեցել տարբեր վիրուսների հետ,- ասել է Ֆիշերը:- Ուստի նրանց մեծ մասի օրգանիզմում կան բազմաթիվ հիվանդությունների դեմ հակամարմիններ, ներառյալ այնպիսի էնտերովիրուսային վարակները, ինչպիսին EV-D68-ն է, որոնք շատ երեխաների օրգանիզմում տակավին չեն արտադրվել»:

Անցյալ շաբաթ Նորվեգիայում գրանցվել են ժամանակավոր անդամալուծության վիճակում հայտնված երկու երեխաներ, ինչը, հնարավոր է, առաջացել է այդ վիրուսից:

Ըստ Ֆիշերի՝ 2009 թվականից Դանիայում արձանագրվել է այս վիրուսով վարակման ընդամենը երեք դեպք: Ամբողջ աշխարհում 2012 թվականին եղել է EV-D68-ի 95 դեպք, սակայն այս տարի արձանագրվել է 1200-1300 դեպք, հաղորդել է ՏԱՍՍ-ը: