«Էբոլա վիրուսի հետագա տարածման վտանգը պահպանվում է». ՄԱԿ-ի առաքելության ղեկավար

Էբոլա վիրուսի հարուցած հիվանդության դեմ մղվող պայքարում միջազգային ջանքերը թույլ են տվել Արևմտյան Աֆրիկայի շրջանների մեծ մասում հիմնականում հասնել ՄԱԿ-ի առաջադրած նպատակներին, սակայն դեռևս պահպանվում է հիվանդության հետագա տարածման վտանգը: Այդ մասին, ինչպես տեղեկացնում է «Արմենպրես»-ը, BBC-ի կորպ որացիայի հրապարակած հարցազրույցում հայտնել է ՄԱԿ-ի՝ Էբոլային արագ հակազդման առաքելության ղեկավար Էնթոնի Բենբերին:

Ինչպես հոկտեմբերին հայտարարել էր առաքելության ղեկավարը, խնդիր է դրված ապահովել այն հիվանդների առնվազն 70 տոկոսի կարանտինը, որոնց մոտ վիրուս է ախտորոշվել, ինչպես նաև ժամանակին թաղել տենդից մահացածների 70 տոկոսի մարմինները:

«Հիվանդության բռնկման սկզբից մենք ձգտում ենք վերահսկողության տակ առնել ճգնաժամային իրադրությունը,-նշել է Բենբերին:-Այդ միջոցառումները ներառում են՝ բուժկենտրոնների ստեղծում, անվտանգ թաղումների կազմակերպում և համայնքների մոբիլիզացում: Եվ այս ռազմավարությունն աշխատում է»:

Սակայն, ինչպես նա խոստովանել է, Արևմտյան Աֆրիկայի առանձին շրջաններում, այդ թվում՝ Սիեռա Լեոնեի մայրաքաղաք Ֆրիթաունում և Պորտ Լոկո քաղաքում, իրադրությունը մնում է ծանր, և, առաքելության ղեկավարի կարծիքով, «հենց այնտեղ է անհրաժեշտ կենտրոնացնել ջանքերը և միջոցները»: Մինչ այժմ առկա է «մոլորակի նաև մյուս շրջաններում Էբոլա վիրուսի տարածման հսկայական վտանգը», -ասել է Բենբերին:

Առողջապահության համաշխարհային կազմակերպության տվյալներով՝ Էբոլա տենդի զոհերի թիվն Արևմտյան Աֆրիկայի երկրներում արդեն հասել է գրեթե 7 հազարի: Վարակված է ավելի քան 16 հազար մարդ: Վիճակն առավել բարդ է Սիեռա Լեոնեում, Լիբերիայում և Գվինեայում: Ամեն շաբաթ, ըստ փորձագետների վկայության, հիվանդությունից 200-300 մարդ է մահանում, հաղորդել է ՏԱՍՍ-ը: