ԱՄՆ-ում հազարավոր ուսանողներ են բողոքել Ֆերգյուսոնում սպանության գործով կայացված վճռի դեմ

ԱՄՆ-ում շարունակվում են բողոքի ակցիաները սպիտակամորթ ոստիկան Դարեն Ուիլսոնին դատի չտալու երդվյալների վճռի դեմ, որն անցյալ ամառ Ֆերգյուսոնում (Միսուրիի նահանգ) գնդակահարել էր 18-ամյա անզեն աֆրոամերիկացի Մայքլ Բրաունին: Դեկտեմբերի 1-ին ամբողջ երկրում հազարավոր ուսանողներ էին դուրս եկել փողոցներ ու պարզել պլակատներ՝ «Ձեռքերդ վեր՝ մի՛ կրակիր», «Չկա արդարություն՝ չկա հաշտություն» և «Ո՛չ ռասիստական ոստիկանությանը» գրություններով, տեղեկացնում է «Արմենպրես»-ը:

Ամբողջ երկրում ցույցեր են տեղի ունեցել տասնյակ բուհերում: Հեղինակավոր Եյլի համալսարանում, որը գտնվում է Նյու Հեյվենում (Քոնեկտիկուտի նահանգ), ուսանողները հրապարակներից մեկն են դուրս եկել բարձրացված ձեռքերով և 4,5 րոպե լուռ կանգնել են՝ հիշեցնելով, որ Բրաունի սպանությունից հետո նրա մարմինը 4,5 ժամ ընկած է մնացել փողոցում: Նման ակցիաներ են տեղի ունեցել նաև Հարվարդի համալսարանում, Միսուրիի նահանգի համալսարանում, Վաշինգտոնի համալսարանում՝ Սենտ Լուիսում, որի արվարձանն է Ֆերգյուսոնը, և ամբողջ երկրի այլ ուսումնական հաստատություններում:

Ցույցերի մեծ մասն սկսվել է կեսօրին՝ հենց այդ ժամանակ է սպանվել Բրաունը: Մի քանի քաղաքներում բողոքավորները պառկել են գետնին՝ մեռած ձևանալով: Նրանց կրծքներին եղել են ցուցնակներ՝ «Սևամորթների կյանքը նունյպես նշանակություն ունի» մակագրությամբ: Նյու Յորքում մի քանի հարյուր ցուցարարներ են հավաքվել քաղաքի գլխավոր հրապարակներից մեկում՝ Յունիոն սքվերում, որտեղ ըստ ավանդույթի բացված է Ծննդյան տոների մեծ շուկան, հաղորդել է ՏԱՍՍ-ը: