ԱՄՆ-ն ակնկալում է, որ ԻՊ-ի դեմ պայքարի նվիրված կոնֆերանսին կմասնակցեն ավելի քան 60 երկրներ. Պետդեպ

ԱՄՆ-ն ակնկալում է, որ «Իսլամական պետություն» ահաբեկչական խմբավորման դեմ պայքարելու համար ստեղծված միջազգային կոալիցիայի 60-ից ավելի մասնակից երկրները կմասնակցեն համաժողովին, որը տեղի կունենա դեկտեմբերի 3-ին Բրյուսելում: Այդ համաժողովն առաջին անգամ կանցկացվի նախարարական մակարդակով, իսկ ԱՄՆ-ի կողմից դրան կմասնակցեն պետքարտուղար Ջոն Քերին և ԻՊ-ի հակազդման կոալիցիայում ԱՄՆ-ի նախագահի հատուկ ներկայացուցիչ պաշտոնաթող գեներալ Ռիչարդ Ալենը: Այս մասին հայտնել է ՏԱՍՍ-ը՝ հղում անելով ԱՄՆ-ի Պետդեպարտամենտի մամուլի ծառայությանը:

«Համաժողովում քննարկվելու է «Իսլամական պետության» ջախջախմանն ուղղված ընդհանուր ջանքերի քաղաքական մեխանիզմը»,- նշել է ԱՄՆ-ի արտաքին քաղաքական գերատեսչությունը:

Ընդհանուր քննարկումներից զատ, Քերին և Ալենը մի շարք երկկողմ հանդիպումներ կանցկացնեն ԱՄՆ-ի դաշնակիցների ու գործընկերների հետ:

Այսօր՝ խորհրդաժողովից մեկ օր առաջ, պետքարտուղարը կմասնակցի ՆԱՏՕ-ի երկրների իր գործընկերների հետ կայանալիք խորհրդակցությանը, որը տեղի կունենա Բրյուսելում: Այնտեղից նա կուղևորվի շվեյցարական Բազել՝ մասնակցելու Եվրոպայի անվտանգության և համագործակցության կազմակերպության անդամ երկրների արտաքին գործերի նախարարների խորհրդի նիստին: Իր հերթին Ալենը կայցելի Բեռլին, որտեղ կոնսուլտացիաներ կանցկացնի գերմանացի մասնագետների հետ:

Ինչպես հայտարարել է Օբամայի վարչակազմը, Իրաքում և Սիրիայում իսլամիստների դեմ պայքարի համար ձևավորված միջազգային կոալիցիան ներառում է ավելի քան 60 պետություններ և մի շարք միջազգային կազմակերպություններ: Ամերիկյան օդուժն սկսել է Իրաքում ԻՊ-ի դիրքերը ռմբակոծել օգոստոսի 8-ից, իսկ Սիրիայում՝ սեպտեմբերի 23-ից: Իրաքում ԱՄՆ-ի ռազմաօդային ուժերի հետ միասին մարտական գործողություններին մասնակցում են Ավստրալիայի, Բելգիայի, Մեծ Բրիտանիայի, Դանիայի, Կանադայի, Նիդեռլանդների և Ֆրանսիայի, Սիրիայում՝ Բահրեյնի, Հորդանանի, Արաբական Միացյալ Էմիությունների և Սաուդյան Արաբիայի ինքնաթիռները: