Սնոուդենն «Արժանի ապրելակերպի համար» մրցանակի դափնեկիր է դարձել

Ստոկհոլմում հանձնել են 2014 թվականի «Արժանի ապրելակերպի համար» միջազգային մրցանակը, որը լրագրողները հաճախ համարում են Նոբելյան մրցանակի այլընտրանք, և որը շնորհվում է շրջակա միջավայրի և մարդու իրավունքների բնագավառում կատարված աշխատանքի համար, տեղեկացնում է «Արմենպրես»-ը:

Արարողությունը կայացել է դեկտեմբերի 1-ին երեկոյան Շվեդիայի խորհրդարանում՝ Ռիքսդագում: Պարգևի արժանացածների թվում էին հինգ ակտիվիստներ և իրավապաշտպաններ ԱՄՆ-ից, Պակիստանից, Հոնկոնգից և Մեծ Բրիտանիայից, որոնք սեպտեմբերին ներկայացվել էին Ստոկհոլմում:

Պարգևատրվածների թվում է, մասնավորապես, Միացյալ Նահանգների հատուկ ծառայությունների նախկին աշխատակից Էդվարդ Սնոուդենը, որը պարգևն ստացել է այն բանի համար, որ «մեծ արիությամբ հայտնի է դարձրել էլեկտրոնային հսկման գաղտնի նյութերը, հսկում, որն ամերիկյան հատուկ ծառայությունները կատարել են ժողովրդավարական վերահսկողության շրջանակներից դուրս և ի խախտումն մարդու հիմնական քաղաքացիական իրավունքների»: Դափնեկիրն ինքը Ստոկհոլմում կայացած արարողությանը չի մասնակցել, բայց ներկա է եղել Ռուսաստանից միացված ուղիղ տեսակապի միջոցով: 

«Մարդու իրավունքների համար պայքարողներս շատ ենք, և մենք շատ բան ենք զոհաբերել, բայց դա այն գինն է, որն արժե դրան, և ես դա կանեի նորից»,- ասել է նա պարգևատրման առթիվ: Ստոկհոլմում կայացած արարողությանը ներկա էր Էդվարդի հայրը՝ Լոնի Սնոուդենը: Սակայն Էդվարդ Սնոուդենի պատվավոր դիպլոմը ոչ մեկին չեն հանձնել, և հիմնադրամի որոշմամբ այն կմնա Ստոկհոլմում՝ սպասելով պարգևի անմիջական տիրոջ ժամանմանը, հաղորդել է ՌԻԱ «Նովոստին»: