ԱՄՆ-ն կաջակցի Ուկրաինայի նոր կառավարությանը. Բայդեն

ԱՄՆ-ն այն կարծիքին է, որ Ուկրաինայի նոր կառավարության ձևավորումը հիմք է ստեղծում այդ երկրում բարեփոխումների «բարդ, բայց անհրաժեշտ գործընթացի» համար: Այդ մասին, ինչպես տեղեկացնում է «Արմենպրես»-ը, Գերագույն ռադայի կողմից նախարարների նոր կաբինետի կազմի հաստատման կապակցությամբ հայտարարել է Միացյալ նահանգների փոխնախագահ Ջոզեֆ Բայդենը:

«ԱՄՆ-ն կաջակցի Ուկրաինայի նոր կառավարությանը՝ կայունացնելու տնտեսությունը, ամրապնդելու ժողովրդավարական ինստիտուտները և պայքարելու կոռուպցիայի դեմ»,- հավաստիացրել է Բայդենը, որը Բարաք Օբամայի վարչակազմում զբաղվում է Ուկրաինայի խնդիրներով և վերջերս հերթական այցն էր կատարել Կիև:

«Մենք նաև կշարունակենք հանդես գալ Ուկրաինայի ինքնիշխանության ու տարածքային ամբողջականության օգտին, կպաշտպանենք դեպի անվտանգ, ժողովրդավարական ու բարեկեցիկ եվրոպական ապագա Ուկրաինայի քաղաքացիների ձգտումը», հավելել է ԱՄՆ-ի փոխնախագահը:

Դեկտեմբերի 2-ին Ուկրաինայի Գերագույն ռադան հաստատել է հանրապետության կառավարության նոր կազմը: Իրենց պաշտոնները պահպանել են հանգուցային գերատեսչությունների ղեկավարները. Պավել Կլիմկինը կշարունակի գլխավորել ԱԳ նախարարությունը, Ստեպան Պոլտորական՝ պաշտպանության նախարարությունը, իսկ Արսեն Ավակովը՝ ՆԳ նախարարությունը:

Նշանակված 19 նախարարներից երեքը մինչև վերջին ժամանակներս օտարերկրյա քաղաքացիներ էին: Ֆինանսների նախարարությունը գլխավորել է ամերիկուհի Նատալյա Յարեսկոն, էկոնոմիկայի նախարարությունը՝ լիտվացի Այվարաս Աբրոմավիչուսը, առողջապահության նախարարությունը՝ Վրաստանի առողջապահության և սոցիալական պաշտպանության նախկին նախարար Ալեքսանդր Կվիտաշվիլին: Դրա համար Պյոտր Պորոշենկոն նախօրյակին հրամանագիր է ստորագրել նրանց Ուկրաինայի քաղաքացիություն տրամադրելու մասին: Իսկ Ռադայում օրինագիծ է գրանցվել երկրի այն օրենքներում փոփոխություններ կատարելու մասին, որոնք վերաբերում են պետական մարմիններում օտարերկրացիներին աշախատանքի ներգրավելուն, հաղորդել է ՏԱՍՍ-ը: