ՄԱԿ-ի գլխավոր քարտուղարին շնորհվել է Հարվարդի համալսարանի «Տարվա հումանիստը» մրցանակը

ԱՄՆ-ի Հարվարդի համալսարանը «Տարվա հումանիստը» մրցանակը շնորհել է ՄԱԿ-ի գլխավոր քարտուղար Պան Գի Մունին: Այս մասին հայտնել է ՏԱՍՍ-ը:

Միավորված ազգերի կազմակերպության գլխավոր քարտուղարը հայտարարել է, որ պատվավոր պարգևն ընդունում է համաշխարհային կազմակերպության ու նրա բոլոր աշխատակիցների անունից:

«Ես գիտեմ, որ ինձ հանձնելով «Տարվա հումանիստը» մրցանակը՝ Հարվարդի հիմնադրամը նաև հարգանքի տուրք է մատուցում Միավորված ազգերի կազմակերպության աշխատանքին և առաջին հերթին, հազարավոր մարդասիրական աշխատակիցներին, իրավապաշտպաններին, նրանց, ովքեր ներգրավված են էբոլա վիրուսին հակազդելու ջանքերում, ինչպես նաև այլ մարդկանց, ովքեր իրագործում են կազմակերպության իդեալները»,- ասել է Պան Գի Մունը:

Պան Գի Մունը, որը Ջոն Քենեդիի անվան պետական կառավարման Հարվարդի ինստիտուտի շրջանավարտ է, դարձել է ՄԱԿ-ի չորրորդ անընդմեջ գլխավոր քարտուղարը, ով արժանացել է պատվավոր մրցանակին, որն ամեն տարի հանձնվում է ամերիկյան բուհի հիմնադրամի կողմից: 1985 թվականին մրցանակը շնորհվել էր պերուացի Խավիեր Պերես դե Կուելյարին, 1994 թվականին եգիպտոսցի Բուտրոս Ղալիին, իսկ 1998-ին՝ գանացի Քոֆի Անանին:

Տարբեր տարիների «Տարվա հումանիստը» կոչումը շնորհվել է Հորդանանի Նուր ալ Հուսեյն թագավորին, արքեպիսկոպոս Դեսմոնդ Տուտուին, ամերիկացի դիզայներ Թոնի Հիլֆիգերին, փոփ երաժիշտ Լայոնել Ռիչիին, դերասանուհի Շերոն Սթոունին: Անցյալ տարի մրցանակը հանձնվել էր պակիստանցի իրավապաշտպան Մալալա Յուսուֆզային: