Էբոլա տենդից զոհերի թվաքանակը գերազանցել է վեց հազարը

Էբոլա տենդի զոհերի թվաքանակը, որը 2014 թվականի փետրվարին բռնկել է Արևմտյան Աֆրիկայում, գերազանցել է վեց հազարը: Այդ մասին, ինչպես տեղեկացնում է «Արմենպրես»-ը, ասված է Առողջապահության համաշխարհային կազմակերպության՝ դեկտեմբերի 3-ին հրապարակված հաշվետվության մեջ:

Առավել մեծ թվով վարակվածներ ու մահացածներ են գրանցվել Լիբերիայում՝ համապատասխանաբար 7 հազար 635 և 3 հազար 145: Սիեռա Լեոնեում վարակված է 7 հազար 312 մարդ, մահացել են 1583-ը: Գվինեայում վիրուսի զոհ է դարձել 1327 բնակիչ, վարակվել են 2 հազար 164-ը:

Նիգերիայում գրանցվել է վիրուսով վարակվելու քսան դեպք, մահացել է ութ մարդ, Մալիում՝ համապատասխանաբար 8 և 6: Սենեգալում և Իսպանիայում վարակվել են մեկական մարդ, երկուսն էլ ողջ են: ԱՄՆ-ում գրանցվել է վարակման չորս դեպք, մահացել է մեկ մարդ:

Ընդամենը Էբոլա տենդով հիվանդացել է 17 հազար 145 մարդ, մահացել են 6 հազար 70-ը: Հոսպիտալացված հիվանդների շրջանում մահացությունը կազմում է 60 տոկոս: