Նյու Յորքում տեղի է ունեցել Սուրբ Ծննդյան տոնածառի լույսերի վառման արարողությունը

Ռոքֆելլերյան կենտրոնի մոտ քառասունհինգ հազար լամպ է ավանդաբար վառվել Նյու Յորքի Սուրբ Ծննդյան ամենամեծ տոնածառի վրա: Հանդիսավոր արարողությունը տեղի է ունեցել այն բողոքների ֆոնին, որոնք քաղաքն ընդգրկել են ոստիկան Դենիել Փանտալեոյի արդարացման պատճառով, ով խեղդամահ էր արել աֆրոամերիկացի Էրիկ Գառներին՝ փորձելով կալանավորել նրան, տեղեկացնում է «Արմենպրես»-ը: Նյու Յորքի քաղաքագլուխ Բիլ դե Բլազիոն որոշում է ընդունել չմասնակցել արարողությանը, դրա փոխարեն նա գնացել է հանդիպելու Գառների հարազատների և մեգապոլիսում բնակվող ազգային փոքրամասնությունների առաջնորդների հետ:

Դեկտեմբերի 3-ի երեկոյան Նյու Յորքում 25-մետրանոց վիթխարի եղևնու մոտ էին հավաքվել հազարավոր մարդիկ: Ոստիկանությունը քաղաքի կենտրոնում փակել էր մի քանի փողոցներ ժողովրդի մեծ կուտակման պատճառով, ինչը Մանհետենում լուրջ խցանումների պատճառ էր դարձել: Հավաքված քաղաքացիների առջև ելույթ են ունեցել Լեդի Գագան, Մերայա Քերին, Սինդի Լոպերը և այլ փոփ-աստղեր:

Առաջին անգամ Մանհետենում Ռոքֆելլերյան կենտրոնի մոտ տոնածառ են զարդարել 1933 թվականին, սակայն այս ավանդույթը ծնունդ է առել դրանից երկու տարի առաջ, երբ, որոշելով նշել Սուրբ Ծնունդը, քաղաքի կենտրոնում շենք կառուցող շինարարները բրգաձև սոճին զարդարել են լոռամրգիով և պահածոների տուփերով:

Այդ ժամանակվանից ի վեր Ռոքֆելլերյան կենտրոնի մոտ տոնական եղևնու լույսերի վառումը դարձել է նշանակալից իրադարձություն և Նյու Յորքում Ծննդյան տոների խորհրդանշաններից մեկը: Սովորաբար հանդիսավոր արարողությունը տեղի է ունենում դեկտեմբերի առաջին չորեքշաբթի օրը՝ Գոհաբանության օրվանից վեց օր անց:

Տոնածառն Ռոքֆելլերյան կենտրոնի մոտ կանգնած կլինի մինչև հունվարի 7-ը: