Մոլդովայի Լիբերալ կուսակցությունը հայտարարել է իշխող կոալիցիայի ձևավորման մասին

Մոլդովայի Լիբերալ կուսակցությունը հայտարարել է կոալիցիայի ձեւավորման մասին վերջերս անցկացված խորհրդարանական ընտրություններից հետո: Այս մասին հայտնել է ՌԻԱ «Նովոստին»:

«Չորեքշաբթի երեկոյան մենք հանդիպում ենք ունեցել Դեմոկրատական կուսակցության, Լիբերալ-դեմոկրատական կուսակցության առաջնորդների հետ: Մենք պայմանավորվեցինք խորհրդարանական մեծամասնություն ձևավորելու և կառավարության համար ծրագրի նախապատրաստման խումբ ստեղծելու շուրջ»,-ասել է կուսակցության առաջնորդ Միխայ Գիմպուն:

Մոլդովայում կայացած խորհրդարանական ընտրությունների նախնական արդյունքները ցույց են տալիս, որ ձայների մեծ մասը տրվել է սոցիալիստների կուսակցության օգտին: ԿԸՀ-ի տվյալների համաձայն՝ այդ կուսակցությունը հավաքել է ձայների 20,51%-ը (327 հազար 910 մարդ), լիբերալ-դեմոկրատները՝ 20,16%-ը (322 հազար 188 մարդ), Կոմունիստների կուսակցությունը՝ 17,48 %-ը (279 հազար 372 մարդ), դեմոկրատները՝ 15,8 %-ը (252 հազար 489 մարդ), լիբերալները՝ 9,67 %-ը (154 հազար 507 մարդ):