Մոգերինին կոչ է արել իրականացնել Մինսկի արձանագրությունը

ԵՄ արտաքին գործերի և անվտանգության քաղաքականության հարցերով գերագույն ներկայացուցիչ Ֆեդերիկա Մոգերինին ԵԱՀԿ-ի արտաքին գործերի նախարարների խորհրդի (ԱԳՆԽ) նիստում կոչ է արել իրականացնել Ուկրաինայի իրադրության կարգավորման վերաբերյալ Մինսկի համաձայնագիրը և արձանագրությունը: Այս մասին հայտնել է ՏԱՍՍ-ը:

Նա նաև Ուկրաինայի իշխանություններից պահանջել է գործարկել ազգային երկխոսությունը:

«Մինսկի արձանագրությունը միակ շրջանակային փաստաթուղթն է, որը համաձայնեցված է Ուկրաինայում հակամարտող կողմերի կողմից, այն պետք է կատարվի», - ասել է եվրոպական դիվանագիտության ղեկավարը:

Մոգերինին ընդգծել է, որ «Ռուսաստանը կարող է այդ գործընթացում կարևոր դեր խաղալ»: Դրա հետ մեկտեղ նա հայտարարել է, որ «անհրաժեշտ է դադարեցնել զենքի ու տեխնիկայի հոսքը սահմանով, օտարերկրյա վարձկանները պետք է դուրս բերվեն երկրից»:

Դիմելով ԵԱՀԿ-ի երկրների նախարարներին՝ նա նշել է «Ուկրաինայի շուրջ ստեղծված ճգնաժամի կայուն կարգավորման» համար աշխատելու անհրաժեշտությունը: «Բոլոր որոշումները պետք է հարգեն երկրի անկախությունը և տարածքային ամբողջականությունը»,-հավելել է Մոգերինին:

Նրա խոսքով՝ «երկարաժամկետ կարգավորումը պետք է ներառի քաղաքական և տնտեսական բարեփոխումներ»: «Ես վստահ եմ, որ նոր կառավարությունը և խորհրդարանը բավականաչափ արագ դա կանեն»,-հայտարարել է Մոգերինին՝ հավելելով, որ «ԵՄ-ն հետագայում էլ կպաշտպանի այդ քայլերը»: