Ղրղզստանը ԵՏՄ-ին անդամակցելու պայմանագիրը կստորագրի դեկտեմբերի 23-ին

Ղրղզստանը պատրասվտում է դեկտեմբերի 23-ին ստորագրել Եվրասիական տնտեսական միություն մտնելու մասին պայմանագիրը, և կառավարությունը, երկրի շահերին համապատասխան, աշխատում է դրա մանրամասների մշակման վրա: Այդ մասին, ինչպես տեղեկացնում է «Արմենպրես»-ը, դեկտեմբերի 9-ին «Ինտերֆաքս»-ին հայտնել են կառավարության մամուլի ծառայությունում:

Մամուլի ծառայության տեղեկատվության համաձայն՝ վարչապետ Ջոմարտ Օթորբաևը միջգերատեսչական հանձնաժողովի նիստ է անցկացրել այս միավորմանը Ղրղզստանի Հանրապետության միանալու շուրջ:

«Ռուսաստանը պաշտպանում է Ղրղզստանի անդամակցությունը: Մենք գտնվում ենք ավարտական փուլում, և անհրաժեշտ է լուծել իրավական բնույթի հարցերը պայմանագրի ստորագրման հետ կապված իրավական հակասությունները բացառելու համար»,- նշել է նա:

«Պայմանագրի բոլոր հարցերը պետք է լուծվեն՝ հաշվի առնելով երկրի շահերը, ուստի պահանջվում է հանգամանորեն քննարկել Եվրասիական տնտեսական միության պայմանագրին Ղրղզստանի միանալու վերաբերյալ պայմանագրի յուրաքանչյուր կետը»,- կարծում է Ղրղզստանի կառավարության ղեկավարը:

«Մենք պետք է ընդունենք պայմանագրի՝ հանրապետության համար ընդունելի տարբերակ և առաջ տանենք ազգային շահերը»,- ընդգծել է Ջ.Օթորբաևը:

Իր հերթին հանրապետության Էկոնոմիկայի նախարար Թեմիր Սարիևը հայտարարել է, որ Եվրասիական տնտեսական հանձնաժողովի անդամները, որոնց մասնակցությամբ մշակվել է պայմանագիրը, քննարկելով դրա նախագիծը, այնտեղ իրենց ուղղումներն են մտցրել, և այժմ Ղրղզստանը պետք է որոշի, թե որքանով են կատարված փոփոխությունները համապատասխանում երկրի ազգային շահերին, հաղորդել է «Ինտերֆաքս»-ը: