Օբաման պատմել է ԱՄՆ-ի նախագահի նկատմամբ իր անբարյացակամության մասին

ԱՄՆ-ի նախագահ Բարաք Օբաման մեկ երեկո դարձել է The Colbert Report («Քոլբերտի զեկույցը») կատակերգական շոուի վարողը: Ծրագրի ընթացքում, ինչպես տեղեկացնում է «Արմենպրես»-ը՝ հղում անելով Reuters-ին, նա պատմել է իր մեծ ականջների և ամբողջ տնով մեկ ցաքուցրիվ արված գուլպաների մասին:

«Ես՝ Սթիվ Քոլբերտս, երբեք չեմ սիրել ԱՄՆ-ի նախագահին: Նա շատ մեծամիտ է և, անշուշտ, իր մասին խոսում է երրորդ դեմքով»,- կատակել է պետության ղեկավարը: Ելույթ ունենալով հաղորդավարի դերում՝ նա նաև առիթը բաց չի թողել հեգնելու ԱՄՆ-ի Հանրապետական կուսացությանը և գովազդելու առողջապահության՝ իր բարենորոգումը:

«Նախագահը կարող էր բարենորոգման մասին երիտասարդությանը պատմել իր ուղերձում կամ էլ մամուլի ասուլիսի ժամանակ: Բայց երիտասարդները նորություններ չեն դիտում, նրանք գերադասում են կատակերգական շոուները»,- մեջբերում է Օբամայի խսքը The Hollywood Reporter-ը:

Դրանից հետո Օբաման զբաղեցրել է հյուրի տեղը և պատասխանել Սթիվ Քոլբերտի հարցերին, հաղորդել է ABC News-ը: Մասնավորապես, նա պատմել է, որ սովորություն ունի գուլպաները շաղ տալու ամբողջ տնով մեկ: «Կինս՝ Միշելը, ինչպես նաև դուստրերս՝ Մալիան և Սաշան, մշտապես կատակում են իմ մեծ ականջների կամ, նրանց կարծիքով, ձանձրալի կոստյումների առիթով»,- խոստովանել է նախագահը:

Այնուամենայնիվ, Օբաման չի կարողացել պատասխանել այն հարցին, թե ինչ զգացողություն ունի, ինքը մեծ նախագահ է, թե մեծագույն: