ԱՄՆ-ն Աֆղանստանում փակել է Բաղրամի բանտը. Պենտագոն

ԱՄՆ-ի պաշտպանության նախարարությունը դեկտեմբերի լույս 11-ի գիշերը հայտարարել է Աֆղանստանում՝ Բաղրամի ռազմակայանում, իր վերջին բանտը փակելու մասին: Պենտագոնի տվյալներով՝ ԱՄՆ-ն Աֆղանստանում այլևս բանտարկյալներ չունի, տեղեկացնում է «Արմենպրես»-ը:

Բաղրամը՝ Աֆղանստանում ամերիկյան զինված ուժերի խոշորագույն ռազմակայանը, գտնվում է Փարվանի նահանգում՝ Քաբուլից 47 կիլոմետր հյուսիս ընկած շրջանում: Սենատի հետախուզության կոմիտեն դեկտեմբերի 9-ին ավելի քան 500 էջ էր հրապարակել 6 հազար էջից բաղկացած զեկույցից: Դրանում ներկայացված են Կենտրոնական հետախուզական վարչության (ԿՀՎ) մի շարք չարաշահումները նախագահ Ջորջ Բուշ Կրտսերի (2001-2009) օրոք, ներառյալ խոշտանգումները և իշխանություններին և հասարակությանը ապատեղեկատվություն տրամադրելը:

«Պաշտպանության նախարարությունն այլևս չի ղեկավարում Աֆղանստանում գտնվող բանտերը և այնտեղ կալանավորներ չի պահում»,- մեջբերում է Associated Press գործակալությունը Պենտագոնի ներկայացուցիչ Մայլս Քեգինսի հայտարարությունը: Ինչպես հայտնել է Պենտագոնի ներկայացուցիչը, այդ բանտից վերջին կալանավորները փոխադրվել են այլ պատժական հիմնարկություններ:

2014 թվականին ավարտվում է Աֆղանստանում ԱՄՆ-ի և ՆԱՏՕ-ի գծով նրա դաշնակիցների գործողության ռազմական փուլը: Դաշինքը պատրաստվում է մինչև տարեվերջ այդ երկրից դուրս բերել զորքերը: Դրանից հետո Աֆղանստանում պետք է մնան մի քանի հազար ամերիկացի զինվորականներ աֆղանական զորքերի և ոստիկանության ուսուցման համար, որոնք պետք է լիովին ստանձնեն երկրի անվտանգության ապահովումը, հաղորդել է ՌԻԱ «Նովոստին»: