ՄԱԿ-ը կոչ է արել կտտանքների լիակատար արգելք սահմանել

ՄԱԿ-ը կոչ է անում լիովին արգելել կտտանքները: Այդ մասին, ինչպես տեղեկացնում է «Արմենպրես»-ը, հայտնել է ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը կտտանքների դեմ՝ ՄԱԿ-ի Գլխավոր ասամբլեայի բանաձևի 30-ամյակի օրը:

Սենատի հետախուզության կոմիտեն դեկտեմբերի 9-ին հրապարակել է 500 էջ այն զեկույցից, որը բաղկացած է 6 հազար էջից: Դրանում ներկայացված են Կենտրոնական հետախուզական վարչության (ԿՀՎ) մի շարք չարաշահումները նախագահ Ջորջ Բուշ Կրտսերի (2001-2009) օրոք, ներառյալ տանջաքննությունները և իշխանություններին և հասարակությանը ապատեղեկատվություն տրամադրելը:

«Կտտանքները պետք է լիովին արգելվեն: Դրա համար շատ խոսքեր անհրաժեշտ չեն: Մահապատժի վերաբերյալ գլխավոր քարտուղարի դիրքորոշումը նույնպես պարզ է. նա դեմ է դրան»,- դեկտեմբերի 10-ին ասել է Դյուժարիկը:

Նրա խոսքով՝ ՄԱԿ-ի գլխավոր քարտուղարը համաձայն է մարդու իրավունքների գերագույն կոմիսար Զեյդ Ռաադ ալ Հուսեյնի դիրքորոշմանը: Վերջինս ավելի վաղ հայտարարել է, որ պատժից անձեռնմխելիությունը կամ վաղեմության ժամկետի օրենքը չպետք է կիրառվեն նրանց նկատմամբ, ովքեր պաշտպանում են խոշտանգումների կիրառումը:

Ինչպես ցույց է տվել ԱՄՆ-ի Սենատի հետախուզության կոմիտեի զեկույցը, կտտանքները տակավին կիրառվում են այն 156 երկրներից մի քանիսում, որոնք վավերացրել են Կտտանքների դեմ կոնվենցիան, և ունեն կտտանքներն արգելող ներքին օրենսդրություն»,- ասել է Դյուժարիկը:

Կտտանքների և արժանապատվությունը նվաստացնող վերաբերմունքի և պատժի այլ դաժան տեսակների դեմ ՄԱԿ-ի Կոնվենցիան Գլխավոր ասամբլեան ընդունել է 1984 թվականի դեկտեմբերի 10-ին: Դրա մասնակիցներ են 156 երկրներ, հաղորդել է ՌԻԱ «Նովոստին»: