Մոսկվան և Դելին կշարունակեն կոնսուլտացիաները Հնդկաստանի և ԵՏՄ-ի ազատ առևտրի գոտու պայմանագրի շուրջ

Ռուսաստանի նախագահ Վլադիմիր Պուտինը գոհունակություն է հայտնել Հնդկաստանի վարչապետ Նարենդրա Մոդիի հետ Նյու Դելիում կայացած բանակցությունների կապակցությամբ: Մամուլի համար արված հայտարարության մեջ նա դրանք որակել է «շատ բովանդակալից ու կառուցողական»:

Բանակցությունների արդյունքում 25 համատեղ փաստաթղթերից բաղկացած փաթեթ է ստորագրվել տարբեր բնագավառներում երկու պետությունների կոոպերացման զարգացման վերաբերյալ:

Պուտինը նշել է, որ ՌԴ-ի համար Հնդկաստանի հետ համագործակցությունը անվերապահ արտաքին քաղաքական գերակայություն է: Կողմերը մտադիր են ամրապնդել քաղաքական երկխոսությունը, զարգացնել հումանիտար շփումները և տնտեսական կոոպերացումը:

Մոսկվան և Նյու Դելին պայմանավորվել են շարունակել կոնսուլտացիաները Հնդկաստանի և Եվրասիական տնտեսական միության ազատ առևտրի գոտու վերաբերյալ պայմանագրի շուրջ:

Կողմերը ծրագրում են ավելի ակտիվորեն իրականացնել բարձրտեխնոլոգիական նախագծեր, մասնավորապես, Ռուսաստանը մտադիր է աջակցել Հնդկաստանում բջջային օպերատորի ստեղծմանը:

Կողմերը փաստաթղթեր են ստորագրվել «Կուդանկուլամ» ատոմային էլեկտրակայանի երկրորդ հերթի կառուցման վերաբերյալ, ճշտել են Հնդկաստանում 20-ից ավելի ատոմային էներգաբլոկների կառուցման, բնական ուրանի համատեղ արդյունահանման և միջուկային թափոնների օգտահանման պլանները:

Պուտինի խոսքով՝ երկու պետությունները մտադիր են շարունակել սերտ կոորդինացումը BRICS-ի, Համագործակցության Շանհայի կազմակերպության և այլ միավորումների ձևաչափով, հաղորդել է ՏԱՍՍ-ը: