Airzena - Georgian Airways ավիաընկերությունը վերսկսել է թռիչքները Ռուսաստան

Աշխարհ 12 Դեկտեմբեր, 2014 12:44

Airzena-Georgian Airways վրացական ավիաընկերության աշխատակիցներն ընդհատել են գործադուլը պայմանով, որ Ռուսաստանի ուղղությամբ թռիչքների հետ կապված իրենց պահանջները կկատարվեն մինչև դեկտեմբերի 15-ը: Ինչպես տեղեկացնում է «Արմենպրես»-ը՝ հղում անելով «Նովոստի Գրուզիա»-ին, Airzena-ն Թբիլիսի-Մոսկվա-Թբիլիսի երթուղով չվերթները վերսկսել է դեկտեմբերի 12-ի առավոտից:

«Մենք ստացել ենք կառավարության խոստումը, որ առաջիկա օրերին մեր բոլոր պահանջները կբավարարվեն: Խոստումը չկատարելու դեպքում բողոքի ակցիաները ոչ միայն կվերսկսվեն, այլև ավելի ընդգրկուն բնույթ կկրեն»,- հայտարարել է ավիաընկերության գլխավոր հրահանգիչ-օդաչու Դավիթ Միկուչաձեն:

Airzena-ի թռիչքային և տեխնիկական անձնակազմը դեկտեմբերի 10-ին գործադուլ էր հայտարարել՝ բողոքարկելով Քաղաքացիական ավիացիայի գործակալության այն որոշումը, որի համաձայն՝ ռուսաստանցի ավիափոխադրողներին գերակա կարգով թույլատրվում է ավիաչվերթներ իրականացնել Ռուսաստանի և Վրաստանի միջև:

Ավելի ուշ Georgian Airways-ին հաջողվել է երկրի Քաղաքացիական ավիացիայի գործակալության հետ պայմանավորվել Ռուսաստանի ուղղությամբ ավիաչվերթների թվաքանակի շուրջ՝ տասը՝ վրացական կողմից և տասը՝ ռուսական: Ավելի վաղ Ռուսաստանի ավիափոխադրողներին թույլատրվել էր ընդհանուր առմամբ իրականացնել շաբաթական 14 չվերթ, իսկ Georgian Airways-ին՝ 7: Չնայած դրան, գործադուլը շարունակվեց մնացած պահանջները բավարարելու նպատակով:

Դեկտեմբերի 11-ին ավիաընկերության աշխատակիցները բողոքի ակցիա են կազմակերպել Թբիլիսիի միջազգային օդանավակայանի մոտ: Նրանց պահանջների թվում են՝ Քաղաքացիական ավիացիայի գործակալության տնօրեն Գուրամ Ջալաղոնիայի պաշտոնաթողությունը, գերատեսչության անջատումն էկոնոմիկայի և կայուն զարգացման նախարարությունից և դրա՝ որպես անկախ կառույցի ձևավորումը, Airzena-ին ֆլագմանի կարգավիճակ տրամադրելը, ինչպես դա եղել է նախկին իշխանության օրոք, և այլն:

Թբիլիսիի և Մոսկվայի միջև ավիահաղորդակցության վերականգնումից հետո կանոնավոր չվերթներ են իրականացնում երեք ավիաընկերություններ, որոնցից երկուսը՝ «Սիբիրը» և «Աերոֆլոտը», ռուսական են, իսկ մեկը՝ «Այրզենան»՝ վրացական, հաղորդել է «Նովոստի Գրուզիա»-ն: