Ադրբեջանցի օլիգարխը խզում է Էրդողանի ընտանիքի հետ բիզնես կապերը

Palmali ընկերությունների սեփականատեր, ազգությամբ թալիշ ադրբեջանցի օլիգարխ Մուբարիզ Մանսիմովի և Թուրքիայի Նախագահ Ռեջեփ Թայիփ Էրդողանի ընտանիքի անդամների համատեղ բիզնես համաձայնագրերում փոփոխություններ են տեղի ունեցել: Դա կատարվել է այն բանից հետո, երբ թուրքական մամուլը սկսել է ուսումնասիրել այդ պայմանագրերը:

Ինչպես հաղորդում է «Արմենպրես»-ը, ծովային փոխադրումների թեմայով մասնագիտացած թուրքական denizhaber.com կայքը գրում է, որ չեղյալ է հայտարարվել 10 բեռնանավերից 5-ի պատվերը, որը Մանսիմովի ընկերությունը թուրքական «Յարդըմջը Գրուպ»-ին տվել էր անցյալ տարվա մայիսին, որից հետո այդ նավերի շուրջ տարօրինակ իրադարձություններ սկսվեցին:

Թուրքիայի Նախագահի եղբորը' Մուստաֆա Էրդողանին, որդուն' Բիլալ Էրդողանին և նրա փեսային' Զիյա Էլգենին պատկանող «ԲՄԶ Գրուպ Դենիզչիլիք շիրքեթի» ընկերությունը դեռևս չկառուցված բեռնանավերը գնել է «Յարդըմջը Գրուպ»-ից: Այդ բեռնանավերը գնելու համար փողը Էրդողանի ընտանիքը վարկով վերցրել է Մանսիմովից, ավելի ճիշտ' նրա Palmali ընկերությունից: Վարկի գումարը կազմել է 180 մլն դոլար: Նույն' դեռևս ավարտին չհսացված բեռնանավերը «ԲՄԶ Գրուպ Դենիզչիլիք շիրքեթի» ընկերությունը պետք էր 10 տարով վարձակալության տար Palamali ընկերությանը:

Թուրքական կայքը գրում է, որ այժմ ծրագրավածից 10-ից պետք է կառուցվեն միայն 5 բեռնանավեր: Նաև ասվում է, որ ադրբեջանցի միլիարդատիրոջ Palmali ընկերությունը թուրքական Albaraka Turk Bankasi բանկին է փոխանցել այդ բեռնանավերի վարկավորման իրավունքը: Բոլոր այդ փոփոխությունների պատճառները հայտնի չեն:

Անցյալ տարվա դեկտեմբերի կեսերին Թուրքիան ցնցած կոռուպցիոն մեծ սկանդալ էր ի հայտ եկել, որով բացահայտվել է թուրքական կառավարության անդամների, այդ թվում' այն ժամանակ Թուրքիայի վարչապետ, ներկայում նախագահ Էրդողանի որդու, փեսայի և դստեր խոշոր կոռուպցիոն գործարքները: Իրավիճակից դուրս գալու համար Էրդողանը հայտարարել էր, որ դրա հետևում կանգնած են արդի իսլամի գաղափարախոս Ֆաթուլլահ Գյուլենի «գյուլենական համայնքի» հետևորդները, որոնք ցանկանում են տապալել իր կառավարությունը, որից հետո աշխատանքից հեռացվեցին հիշյալ սկանդալը բացահայ տած իրավապահները: