Սիդնեյի կենտրոնում զինված մի տղամարդ պատանդ է վերցրել տասնյակ մարդկանց

Սիդնեյի կենտրոնի սրճարաններից մեկում զինված մի տղամարդ պատանդ է վերցրել տասնյակ մարդկանց, հաղորդում է «Արմենպրես»-ը՝ հղում անելով տեղական ԶԼՄ-ներին:

Պատանդառուն բանակցություններ է պահանջել Ավստրալիայի վարչապետ Թոնի Էբոթի հետ: Նա նաև հայտարարել է, որ ամբողջ քաղաքում պայթուցիկ նյութեր են տեղադրված:

Ըստ տարբեր տվյալների՝ պատանդների թիվը 13-ից 50 է: Ահաբեկիչների ճշգրիտ թվաքանակը նույնպես հայտնի չէ: Պատանդներից մի քանիսը ձեռքերը վեր պարզած կանգնած են պատուհանների մոտ:

Ականատեսների վկայությամբ՝ առավոտյան տեղական ժամանակով ժամը մոտ 10-ին (Երևանի ժամանակով՝ ժամը 3-ին) սրճարան է մտել զինված մի տղամարդ՝ գլխակապով, որի վրա եղել է արաբերեն մակագրություն:

Ահաբեկիչները նաև պատուհանից կախել են սև դրոշ' արաբերենով սպիտակ գույնի մակագրությամբ: Ենթադրվում է, որ դա «Ջաբհաթ ան Նուսրա» կազմակերպության դրոշն է, որը Սիրիայում կռվում է երկրի գործող իշխանությունների դեմ:

Ոստիկանությունը շրջապատել է այն շենքը, որտեղ գտնվում է սրճարանը: Պատահարի շրջանում արգելափակված է տրանսպորտի երթևեկությունը:

Սպառնալիքների պատճառով իրավապահներն սկսել են ստուգել քաղաքի կենտրոնական շրջանը՝ պարզելու այնտեղ պայթանյութի առկայությունը: Սիդնեյի օպերային թատրոնից տարհանում է իրականացվել այնտեղ կասկածելի սարքի վերաբերյալ հաղորդումից հետո:

Ավստրալիայի վարչապետ Թոնի Էբոթը հանդես է եկել հատուկ հայտարարությամբ, որում հայտնել է, որ անցկացրել է կառավարության անվտանգության կոմիտեի արտակարգ նիստ: Նա Սիդնեյում տեղի ունեցող իրադարձությունները գնահատել է «շատ տագնապալի» և հավաստիացրել, որ ոստիկանությունը և հատուկ ծառայությունները «լավ պատրաստված են, հանդերձված և ստեղծված իրավիճակում գործում են պրոֆեսիոնալ կերպով», հաղորդել է ՏԱՍՍ-ը: