Պորոշենկոն, Օլանդը և Մերկելը քննարկել են իրավիճակն Ուկրաինայի արևելքում

Ուկրաինայի նախագահ Պյոտր Պորոշենկոն կիրակի օրը հեռախոսազրույց է ունեցել Գերմանիայի կանցլեր Անգելա Մերկելի և Ֆրանսիայի նախագահ Ֆրանսուա Օլանդի հետ: Այս մասին հայտնել է «Ինտերֆաքսը»՝ հղում անելով Ուկրաինայի ղեկավարի մամուլի ծառայությանը:

Երկու կողմերը քննարկել են իրավիճակը Դոնբասում: Նրանք նշել են, որ կողմերը դուրս չեն բերել զորքերը տարածաշրջանից, ազատ չեն արձակվել պատանդներին և չեն փակել սահմանը՝ չնայած Մինսկում ձեռք բերված պայմանավորվածություններին:

Ուկրաինայի նախագահը հատկապես ընդգծել է բոլոր պատանդների ազատմանը հասնելու անհրաժեշտությունը, որոնց թիվն այսօր գերազանցում է 600-ը:

Պորոշենկոն, Մերկելը և Օլանդը պայմանավորվել են, որ եռակողմ շփման խումբը հնարավորինս արագ հանդիպի, որպեսզի միջոցներ ձեռնարկի Մինսկի պայմանավորվածություններն իրագործելու համար, որոնք հակամարտության ապաէսկալացման, ինչպես նաև Դոնբասի հումանիտար հիմնախնդիրների լուծման հիմքն են:

Զրուցակիցները նաև քննարկել են Ուկրաինայի համար մակրոֆինանսական օգնությունն ավելացնելու հնարավորությունները՝ ինչպես միջազգային ֆինանսական կազմակերպությունների մեխանիզմի միջոցով, այնպես էլ երկկողմ մակարդակով:

Ուկրաինայի և Ֆրանսիայի նախագահները, ինչպես նաև Գերմանիայի կանցլերը, հանդես են եկել նորմանդական ձևաչափով երկխոսությունը շարունակելու նպատակահարմարության օգտին: