Թուրքմենստանը և Վրաստանը փոխադրամիջանցք են ստեղծելու

Թուրքմենստանի նախագահ Ղուրբանղուլի Բերդիմուհամեդովը և Վրաստանի նախագահ Գեորգի Մարգվալաշվիլին, որը պաշտոնական այցով գտնվում է Աշգաբադում, դեկտեմբերի 15-ին կայացած բանակցությունների ընթացքում գլխավոր ուշադրությունը դարձրել են տրանսպորտի ոլորտում թուրքմենա-վրացական համագործակցության զարգացմանը, տեղեկացնում է «Արմենպրես» -ը:

Ինչպես բրիֆինգի ժամանակ հայտնել է Թուրքմենստանի ղեկավարը, ամփոփելով բանակցությունների արդյունքները, հանդիպման ընթացքում կողմերը հատուկ ուշադրություն են դարձրել Կասպիական և Սևծովյան տարածաշրջանների միջև տրանսպորտա-տարանցումային միջանցքի ստեղծմանը: Կողմերը նշել են, որ այդ միջանցքի ստեղծումը հզոր ազդակ կհաղորդի Եվրոպայի, Մերձավոր ու Միջին Արևելքի երկրների միջև միջտարածաշրջանային համագործակցության զարգացմանը:

Իր հերթին Գեորգի Մարգվելաշվիլին նշել է, որ Վրաստանը, կապող դեր խաղալով Կասպիական և Սևծովյան տարածաշրջանների միջև, Թուրքմենստանին օգնություն ցույց կտա Եվրամիության երկրների հետ համագործակցության զարգացման գործում:

Կողմերը քննարկել են նաև Աֆղանստան-Թուրքմենստան-Ադրբեջան-Վրաստան փոխադրամիջանցքի ստեղծման հնարավորությունները: Կողմերի կարծիքով՝ այդ տրանսպորտային նախագծի իրականացումը թույլ կտա նաև Աֆղանստանին ներգրավել տարածաշրջանային ու միջտարածաշրջանային առևտրատնտեսական կապերի մեջ:

Ինչպես ճեպազրույցի ընթացքում նշել է նախագահ Ղուրբանղուլի Բերդիմուհամեդովը, թուրքմենա-վրացական ներկայիս բանակցությունների ընթացքում կարծիքներ են փոխանակվել երկու երկրների միջև առևտրատնտեսական համագործակցությունն արագորեն նոր մակարդակի բարձրացնելու շուրջ: Պետության ղեկավարն ընդգծել է, որ Թուրքմենստանը և Վրաստանը նպատակ ունեն ընդլայնել երկկողմ առևտրի ծավալը, զարգացնել համագործակցությունը վառելիքաէներգետիկական ոլորտում, տրանսպորտի և հաղորդակցուղիների բնագավառում, տեքստիլ, թեթև ու քիմիական արդյունաբերության և այլ ճյո ւղերում, հաղորդել է ՌԻԱ Նովոստին: