Իվանիշվիլիի նախկին կինը Վրաստանի նախկին վարչապետին մեղադրել է երկկնության մեջ

ՌԴ քաղաքացի Ինգա Պավլովան մեղադրում է Վրաստանի նախկին վարչապետ Բիձինա Իվանիշվիլիին երկկնության և իր անձի նույնականացման տվյալներն անօրինականորեն օգտագործելու մեջ: Այս մասին հայտնել է «Ինտերֆաքսը»:

Youtube- ում տեղադրված տեսագրության մեջ, որը երկուշաբթի օրը տարածել են Վրաստանի ԶԼՄ-ները, Պավլովան պնդում է, որ 1991-ին, Փարիզում, ամուսնացել է Իվանիշվիլիի հետ, իսկ 1994 թ. ամուսնալուծվել նրա հետ, բայց միայն վերջերս է իմացել, որ 1991 թ.-ին նա ամուսնացել է Վրաստանում Էկա Խվեդելիձեի հետ: «Ստացվում է, որ 1991 թ. Իվանիշվիլին գրեթե միաժամանակ ամուսնացել է երկու կանանց հոտ», - հայտարարել է ռուսաստանցի կինը:

Նա Իվանիշվիլիից ֆինանսական փոխհատուցում է պահանջում իր անձի նույնականացման տվյալներն օգտագործելու համար: Մասնավորապես, ինչպես պնդում է Պավլովան, Իվանիշվիլին և նրա քարտուղար Ստանիսլավ Պոլյակովն իր անունն օգտագործել են Ռուսաստանում «Ֆակտորիալ» ընկերությունը հիմնելու համար, որը գործել է 1994-ից մինչև 2006 թվականը:

Բացի այդ, փաստաթղթերի համաձայն, որոնք իրեն է հանձնել ոմն անկախ լրագրող Վլադիմիր Իվանիձեն, Պավլովան իբր Ռուսաստանում աշխատել է Իվանիշվիլիի երկու բանկերում: «Այդ տեղեկատվությունն մեծ ցնցում էր ինձ համար, քանի որ ես երբեք ոչ մի ընկերություն չեմ հիմնել և բանկերում չեմ աշխատել»,-հայտարարում է Պավլովան և հայտնում Իվանիշվիլիին դատի տալու ցանկության մասին:

Նշում է, որ առայժմ Վրաստանի նախկին վարչապետը և միլիարդատերը չի մեկնաբանել իր հասցեին հնչած այդ մեղադրանքները: