Ադրբեջանի իշխանությունները մտադիր են պատժել ԱՄՆ-ում իրենց օգտին լոբբիզմը ձախողած պաշտոնյաներին

Տարիներ շարունակ Ադրբեջանի իշխանությունները միլիոնավոր դոլարներ են ծախսում Վաշինգտոնի հետ իրենց հարաբերությունները նորմալացնելու վրա, սակայն, դրան ի պատասխան, ոչ մի դրական հայտարարություն չեն ստանում «ժողովրդավարության օրրանից»: Այս մասին, ինչպես հաղորդում է «Արմենպրես»-ը, հայտնում է minval.az լրատվական կայքը:

«Ադրբեջանական իշխանությունների և ԱՄՆ-ի միջև լարվածությունը չի ավարտվում երկու երկրների միջև խնդիրներով, այլ տարածվում է նաև իշխանությունների վրա ևս: «Ենի Մուսավաթ» թերթի հաղորդմամբ, վերջին շրջանում ԱՄՆ-ի բազմաթիվ խիստ հայտարարությունները, այդ թվում՝ Պետքարտուղարության կողմից դեռևս չհրապարակված տարեկան զեկույցում առկա արտակարգ կոշտությունը, սաստիկ զայրացրել են Ադրբեջանի իշխանություններին», -գրում է կայքը:

Նշվում է, որ երկար տարիներ մի քանի անձանց միջոցով իշխանությունները միլիոնավոր դոլարներ են ծախսում ԱՄՆ-ի հետ ոչ պաշտոնական հարաբերություններ պահպանելու համար: Հանուն Ադրբեջանի իշխանությունների պաշտպանության այդ միջոցները ծախսվում են սենատորների, կոնգրեսականների և ԱՄՆ-ի տարբեր պետական կառույցների բարձրաստիճան անձանց հետ համագործակցության անվան տակ: «Դրա վրա մեծ փողեր են ծախսվել: Սակայն, մինչ այժմ հնչող խիստ հայտարարությունների, բողոքների և պահանջների փոխարեն, ներկայում ԱՄՆ-ից չկա իշխանություններին պաշտպանող անգամ մեկ տե քստ, չնայած այն բանին, որ տրանսպորտի նախարար Զիյա Մամեդովի կլանը, ով պատասխանատու է ԱՄՆ-ում լոբբիստական գործունեության համար, համառորեն աջակցության հայտարարություններ է պահանջում», -նշում է կայքը:

Ըստ կայքի՝ իշխանությունները խստորեն քննադատել են ԱՄՆ-ում Ադրբեջանի դեսպանությանը, Ադրբեջան-ԱՄՆ դաշնության ղելավար Անար Մամեդովին (Զիյա Մամեդովի որդին), արտաքին քաղաքականության ոլորտում առաջատար դեմքեր, պատգամավորներ Սամեդ Սեիդովին, Էլխան Սուլեյմանովին և խորհրդարանական կուսակցություներից մեկի առաջնորդին այն բանի համար, որ հենց վերջիններս էին իրենց զեկույցներում պնդում, թե ԱՄՆ-ի հետ ամբողջ անհրաժեշտ աշխատանքն անցկացվում է, համապատասխան շրջանակները «վնասազերծված» են, և որ ամերիկյան բոլոր բողոքներին հակառակ՝ «փաստարկներ& raquo; կհնչեն հենց ԱՄՆ-ից:

«Երկար տարիներ գերադասվում էր այդ հարաբերությունները կարգավորել ոչ պաշտոնական մակարդակում: Սակայն, այսօր երևում է, որ իշխանություններն ԱՄՆ-ից իրական աջակցություն չեն ստանում անգամ ոչ պաշտոնական հարաբերություններում: Այն շրջանակները, որոնք իշխանություններին ներկայացվել են որպես իրենց կողմնակիցներ, երես են թեքել նրանցից, և չկա որևէ իրական պաշտպանություն», -գրում է կայքը: Այն հավելում է, որ այդ հարցի լուրջ քննարկոմներից հետո որոշվել է լրջորեն պատժել այն բոլոր մարդկանց, ովքեր ԱՄՆ-ից հարաբերական պաշտպանություն սպասել ու հավաստաիցումներ էին տալիս:

Ներիշխանական հավաստի աղբյուրից կայքին հասած տեղեկություններով՝ ստեղծված իրավիճակի համար պատասխանատու անձինք լրջորեն պատժվելու են: Նրանք ոչ միայն հեռացվելու են այդ աշխատանքներից, նրանցից խլվելու են նաև ազդեցության ներքին լծակները: «Պատկերավոր ասած՝ այսօր իշխանության մեջ ամերիկյան քամի է փչում և այն «կքշի» որոշ հայտնի մարդկանց», -ամփոփում է կայքը: