ԱՄՆ-ը մակրոտնտեսական աջակցություն կապահովի Ուկրաինայի բարեփոխումներին. Բայդեն

ԱՄՆ-ը մտադիր է գործընկերների հետ միասին, ներառյալ Արժույթի միջազգային հիմնադրամը, մակրոտնտեսական աջակցություն ապահովել Ուկրաինայի բարեփոխումներին: Այդ մասին, ինչպես տեղեկացնում է «Արմենպրես»-ը՝ հղում անելով Սպիտակ տան մամուլի ծառայությանը, ԱՄՆ-ի փոխնախագահ Ջոզեֆ Բայդենը հայտարարել է Ուկրաինայի նախագահ Պյոտր Պորոշենկոյի հետ կայացած հեռախոսազրույցի ընթացքում: Զրուցակիցները քննարկել են «Ուկրաինայի ֆինանսական և էներգետիկական իրադրությունը, ինչպես նաև իրադարձությունների զարգացումը երկրի արևելքում»:

Բայդենը «ողջունել է Ուկրաինայի կողմից դեկտեմբերի 9-ին հրադադարի հայտարարումը»: Ընդսմին Պորոշենկոն նշել է, որ «անդորրի ռեժիմը» օգնել է «վերջին մի քանի օրվա ընթացքում էականորեն կրճատել զոհերի թիվը»:

Կողմերը նաև կոչ են արել Ռուսաստանին՝ հասնել այն բանին, որ աշխարհազորայինները «դադարեն արգելափակել հումանիտար օգնության տեղափոխումն Ուկրաինայի արևելքի՝ հակամարտության մեջ ներքաշված շրջաններ»:

Ավելի վաղ ուկրաինական պետության ղեկավարի մամուլի ծառայությունը հայտնել է, որ Բայդենը «հավաստել է Ուկրաինային օգնություն ցուցաբերելու ԱՄՆ-ի մտադրությունը, ինչպես նաև ԱՄՀ-ի միջոցով գումարներ հատկացնելու համար ջանքեր գործադրելու պատրաստակամությունը»: Բացի այդ, «Պորոշենկոն կանխապահովել է Բայդենի հավելյալ աջակցությունը Դոնբասի իրադրության կարգավորման խաղաղ ծրագրի իրագործման և Ուկրաինայի կողմից տնտեսական մարտահրավերների հաղթահարման համար փոխգործակցության հարցում», հաղորդել է ՏԱՍՍ-ը: