Լուկաշենկոն կառավարությունից պահանջել է չապավինել միայն Ռուսաստանին

Բելառուսի նախագահ Ալեքսանդր Լուկաշենկոն կառավարության առջև խնդիր է դրել ցանկացած գնով գտնել բելառուսական արտադրանքի վաճառահանման նոր շուկաներ, տեղեկացնում է «Արմենպրես»-ը՝ հղում անելով ԲԵԼՏԱ-ին:

«Մենք չենք կարող ամբողջ ժամանակ հույսներս դնել Ռուսաստանի վրա, թեև նա եղբայրական երկիր է: Որովհետև, տեսնում եք, այդ մեկ շուկան փլուզվել է ու մեզ իր հետևից տարել»,- ասել է պետության ղեկավարը՝ նշելով, որ այսօրվա դրությամբ Ռուսաստանի շուկայում վաճառվում է արտադրանքի սոսկ 40-45 տոկոսը, 85 տոկոսի փոխարեն, ինչպես նախկինում էր:

Ըստ որում նախագահը նշել է, որ Բելառուսը նվազեցրել է կախվածությունը մեկ շուկայից, «բայց, ինչպես երևում է, դեռ քիչ է»: «Գումարած Ուկրաինան: Չեմ կարծում, թե լավագույն իրավիճակ է նաև Ղազախստանում: Ուստի մենք ցանկացած գնով պետք է դուրս գանք նոր շուկաներ: Եվ դա կարելի է»,- վստահություն է հայտնել Լուկաշենկոն:

Դեկտեմբերի սկզբին Բելառուսի նախագահը Ռուսաստանին մեղադրել է Մաքսային միության նորմաների խախտման մեջ՝ Մոսկվայի կողմից հանրապետությանի մի շարք ձեռնարկություններից պարենի մատակարարումների արգելք սահմանելու կապակցությամբ: Նա նաև ժխտել է Ռուսաստանի շուկա պարենի մատակարարումների ընթացքում մեքենայություններ կատարելու մեղադրանքները, ինչպես նաև չի ընդունել բելառուսական արտադրանքի նկատմամբ ներկայացված դժգոհությունները: