Վախթանգ Կիկաբիձեն պատմել է, թե ինչպես է իրեն «ինչ-որ հիմար զանգել ինքնահռչակ ԴԺՀ-ից» և սպառնացել սպանել

Oրերս Վախթանգ Կիկաբիձե այցելել է Կիև և ելույթ ունեցել «Վեչերնի Կվարտալ» ամանորյա հաղորդաշարի շրջանակներում: Այս մասին հայտնել էobozrevatel.com-ը։

Հարցազրույցի ժամանակ Կիկաբիձեն հիշել է մի զվարճալի դեպքի մասին, որը տեղի է ունեցել իր հետ Ուկրաինային աջակցելու պատճառով։ Դերասանին զանգահարել է մի անհայտ անձ՝ ասելով, որ ինքնահռչակ Դոնեցկի Ժողովրդական Հանրապետությունից է և սպառնացել է սպանել նրան։

«Ինչ-որ հիմար էր զանգել ինձ, ինչը, սակայն, ինձ այդքան էլ չի անհանգստացնում, որքան այն հարցը՝ որտեղի՞ց իրեն իմ անձնական հեռախոսահամարը»,- պատմել է նա։

76-ամյա դերասանի կարծիքով` իր հեռախոսահամարը այսպես կոչված «ԴԺՀ»-ից կարող էին տալ միայն լրագրողները։

ԶԼՄ-ներն անդրադարձել են քաղաքական թեմաներին և խնդրել են Կիկաբիձեին խորհուրդ տալ շարքային ուկրաինացիներին՝ ինչպես հաղթել Ռուսաստանի հետ տեղեկատվական պատերազմում և պահպանել Ռուսաստանում գտնվող իրենց ընկերներին։

Մտորելուց հետո դերասանը պատասխանել է. «Եթե ես դա իմանայի, ապա մեզ մոտ էլ ամեն ինչ կարգին կլիներ։ Մենք անցել ենք այն ամենը, ինչ կատարվում է այժմ ձեզ մոտ»։