Մոսկվայում փոխանակման մի շարք կետեր դադարեցրել են արժույթի վաճառքը

Մոսկվայի կենտրոնում արժույթի փոխանակման մի շարք կետեր դադարեցրել են դոլարի և եվրոյի վաճառքը՝ դա բացատրելով արժույթի դեֆիցիտով, տեղեկացնում է «Արմենպրես»-ը՝ հղում անելով ՌԻԱ «Նովոստիին»:

Հերթեր են նկատվում միայն խոշոր բանկերի մասնաճյուղերում, բայց այնտեղ էլ, դոլար կամ եվրո վաճառելու խնդրանքին, որպես կանոն, պատասխանում են մերժումով: Փոքր բանկերի գրասենյակները բաց են, բայց բոլոր այցելուներին անձնակազմն իսկույն զգուշացնում է, որ գործառնություններ չեն կատարվում: «Այսօր արժույթ չկա, ամբողջն սպառվել է: Պատվիրել ենք վաղվա համար, բայց առայժմ չգիտենք՝ կլինի արդյոք վաճառք»,- հայտնել է օպերացիոն դրամարկղներից մեկի աշխատակցուհին:

Փոխանակման կետերի տերմինալներում ներկայացված արժույթների փոխարժեքը դեկտեմբերի 16-ի երեկոյի համեմատությամբ էականորեն չի փոխվել. դոլարը գնում են միջինը 61-65 ռուբլով, հաճախորդներին վաճառում՝ 75-80 ռուբլով, եվրոյի դեպքում համապատասխանաբար՝ 80-85 և 95-100 ռուբլով: