Վենեսուելայի առաջնորդը հաստատել է ԱՄՆ-ի հետ երկխոսությունը շարունակելու պատրաստակամությունը

Վենեսուելայի նախագահ Նիկոլաս Մադուրոն վերահաստատել է իր երկրի պատրաստակամությունը՝ Միացյալ Նահանգների հետ քաղաքական երկխոսությունը շարունակելու վերաբերյալ: Այս մասին հայտնել է ՏԱՍՍ-ը:

Նման հայտարարությամբ նա հանդես է եկել երեկ Արգենտինայում՝ Հարավամերիկյան ընդհանուր շուկայի գագաթաժողովի ընթացքում:

«Մենք կշարունակենք ուղիներ փնտրել, որոնք կտանեն դեպի նրան, որ մեր հարաբերությունները հարևան հսկայի հետ անհրաժեշտ ուղղությամբ ընթանան»,- հայտարարել է Մադուրոն՝ նշելով, որ երկխոսություն հաստատելու համար ԱՄՆ-ն պետք է հարգանք դրսևորի Վենեսուելայի հանդեպ։

Նա ողջունել է ԱՄՆ-ի՝ Կուբայի հետ դիվանագիտական հարաբերությունները վերականգնելու որոշումը:

«Ես շատ երջանիկ եմ, պետք է խոստովանել, որ նախագահ Օբամայի կողմից դա համարձակ քայլ է եղել, հնարավոր է՝ ամենակարևորը նրա ամբողջ կառավարման ընթացքում»,- ասել է Մադուրոն։