Եվրախորհրդարանը Թուրքիայում լրագրողների ձերբակալությունը մղձավանջ է անվանել

Եվրախորհրդարանում Թուրքիայում մամուլի ազատության իրավիճակի և Եվրամիություն-Թուրքիա հարաբերությունների օրակարգով նիստ է տեղի ունեցել, որում դեկտեմբերի 14-ին այդ երկրում մեծ թվով լրագրողների և մամուլի աշխատակիցների ձերբակալությունը մղձավանջ է անվանվել:

Ինչպես հաղորդում է «Արմենպրես»-ը` վկայակոչելով թուրքական Demokrat Haber լրատվականն կայքը, Եվրախորհրդարանը Թուրքիայի իշխանություններին հերթական անգամ քննադատել է լրագրողների ձերբակալության համար:

Երկար տարիներ Եվրախորհրդարանում Թուրքիայի ԵՄ անդամակցության աջակից լիբերալ խորհրդարանական Մարիետ Շաակեն հայտարարել է, որ Թուրքիայի և Եվրախորհրդարանի միջև հարաբերությունները հետընթացի շեմին են հայտնվել: «Թուրքիայում որևէ հատված չի մնացել, որին չի սպառնացել այդ երկրի նախագահ Էրդողանը: Լրագրողներին ուղղված գործողությունները դրա վերջին օրինակն են: Թուրքիան աննախադեպ կերպով հեռանում է Եվրոպայից: Այդտեղ իշխանության լիազորներն իրենց օրենքից բարձր են դասում: Այլևս հարկադրված ենք հայտնել Թուրքիային, որ մեր միջև հարաբերություն ները չեն կարող լինել նախկինի նման», -ասել է Շաակեն:

Կանաչների խմբակցության անդամ Տակիս Հաջիգեորգուսը, նշելով, որ Թուրքիան սկսել է «նեխել և հոտել ներսից», պահանջել է, որ ԵՄ-ը հանդես գա Անկարայի նկատմամբ պատժամիջոցներ կիրառելու ուղերձով:

Ժողովրդավարների խմբակցությունից շվեդ խորհրդարանական Քրիստինա Վինբերգը հայտարարել է, որ Թուրքիայում ամեն օր ոտնահարվում է մարդու իրավունքը, նախկինի համեմատ, այդ հարցում ոչ մի առաջընթաց տեղի չի ունեցել, և որ առաջ գնալու փոխարեն, Թուրքիան հետ է գնում:

Քրիստոնեադեմոկրատական խմբակցության անդամ Ռենատա Զոմմերը համոզմունք է հայտնել, որ Թուրքիայում այլևս վերացել է օրենքի գերակայությունը և այդ երկրում տիրում է Էրդողանի իրավունքը:

Բոլոր ելույթ ունեցողներն ակնարկել են, որ Թուրքիան ներկայում ղեկավարում են կայսերական և խալիֆայական նկրտումներով անձինք: