Ավստրալիայի Կեռնս քաղաքում սպանվել են ութ երեխաներ՝ եղբայրներ ու քույրեր

Ավստրալիայի Կեռնս քաղաքի տներից մեկում սպանվել են ութ երեխաներ՝ եղբայրներ ու քույրեր, պատահարի վայրում հայտնաբերվել է նրանց մայրը՝ ծանր վերքերով, տեղեկացնում է «Արմենպրես»-ը՝ հղում անելով Cairns Post տեղական թերթին:

Երկրի Քվինսլենդ հյուսիսարևելյան նահանգի խաղաղօվկիանոսյան ափի Կեռնս քաղաքի Մյուրեյ-սթրիթում գտնվող տուն ոստիկանություն են կանչել Երևանի ժամանակով ժամը 4:20-ին: Սպանված երեխաները 18 ամսականից մինչև 15 տարեկան էին: ԶԼՄ-ների տվյալներով՝ նրանց բոլորին սպանել են սառը զենքով ու խեղդամահ են արել: Կինը, որը դանակի վերքեր է ստացել, տեղափոխվել է հիվանդանոց: Նա կայուն վիճակում է և օժանդակում է հետաքննությանը:

34-ամյա կնոջ զարմուհին՝ Լայզա Թայդեյը, հայտնել է, որ երեխաները եղբայրներ ու քույրեր էին, իսկ տուժածը նրանց մայրն է: Նրա խոսքով՝ զոհերը հայտնաբերվել են ընտանիքի մեկ այլ անդամի՝ 20-ամյա պատանու կողմից, որը տեսակցելու էր եկել իր եղբայրներին ու քույրերին:

Կեռնսի միջադեպը տեղի է ունեցել արմատական իսլամիստների կողմից հարձակումների վտանգի պատճառով երկրում պահպանվող լարվածության ֆոնին, բայց ԶԼՄ-ները նշում են, որ հանցագործությունը կապված չէ ահաբեկչության հետ, հաղորդել է ՌԻԱ Նովոստին: