ՌԴ-ից Դոնեցկ հումանիտար օգնություն տեղափոխող ավտոշարասյունը հատել է սահմանը

Դոնբասի բնակիչների համար նախատեսված հումանիտար օգնության ծանրոցներով բեռնված ՌԴ ԱԻՆ-ի ավտոշարասյունը հատել է ռուսական սահմանը և շարժվել Դոնեցկի և Լուգանսկի ուղղությամբ: «Արմենպրես»-ի հաղորդմամբ' ինչպես տեղեկացնում է «ՌԻԱ Նովոստին», այս մասին լրագրողներին տեղեկացրել են ՌԴ ԱԻՆ-ից:

Ռոստովի մարզի «Մատվեև Կուրգան» և «Դոնեցկ» անցակետերում ավարտվել է հումանիտար բեռի մաքսային գրանցման գործընթացը: «Դրանից հետո ավելի քան 90 բեռնատարներ ուղղություն են վերցրել դեպի Դոնեցկ, մոտավորապես նույն քանակությամբ մեքենաներ էլ շարժվել դեպի Լուգանսկ»,-հայտնել է ԱԻՆ աշխատակիցը:

Ավելի վաղ 180-ից ավելի բեռնատարներից բաղկացած շարասյունը բաժանվել է երկու մասի: Ընդհանուր առմամբ, Դոնբաս պետք է հասցվեր 1,4 հազար տոննայից ավելի հումանիտար օգնության բեռ: Օգնության փաթեթներում սննդամթերքի, դեղորայքի և շինարարական պարագաների հետ մեկտեղ կան նաև ամանորյա նվերներ: Սա Դոնբասի համար նախատեսված արդեն թվով տասներորդ հումանիտար օգնության շարասյունն է: Նախորդ ինը օգոստոսի կեսին մոտ 12 հազար տոննա հումանիտար օգնության բեռ են տեղափոխել Դոնբաս: