Ֆրանսիայում իսլամիստն ավտոմեքենան ուղղել է մարդկանց բազմության վրա

Ֆրանսիայի ներքին գործերի նախարար Բեռնար Կազնյովը դեկտեմբերի 22-ին կայցելի Դիժոն քաղաք, որտեղ նախօրյակին տղամարդն ավտոմեքենան ուղղել է մարդկանց բազմության վրա՝ վիրավորելով 11 հոգու:

Ինչպես տեղեկացնում է «Արմենպրես»-ը, հղում անելով երկրի ՆԳ նախարարությանը, Renault Clio-ի ղեկի առջև նստած 40-ամյա տղամարդու ինքնությունը պարզված է: Նա ոստիկանությունում հաշվառման մեջ է եղել 1990-ական թվականներին կատարված ոչ մեծ իրավախախտումների համար: Նա հոգեպես անհավասարակշիռ է համարվում և ավելի վաղ բժիշկների հսկողության տակ է եղել տեղական հոգեբուժարանում:

Պատահարը լայն արձագանք է առաջացրել այն հանգամանքի կապակցությամբ, որ հանցագործը վրաերթի ժամանակ գոչում էր՝ «Ալլահ աքբար» և հիշատակում էր «պաղեստինցի երեխաներին»: Այս տեղեկատվությունը տեղական հեռուստատեսությանը հայտնել է ոստիկանների արհմիության ներկայացուցիչ Միշել Բոննեն:

Հանցագործը բռնված է, ավտոմեքենայի երկու ուղևորները թաքնվել են, նրանց որոնում է կատարվում:

ՆԳՆ-ում հայտարարել են, թե առայժմ վաղ է խոսել պատահարի և այն միջադեպի միջև կապի առկայության մասին, որը դեկտեմբերի 20-ին տեղի է ունեցել Տուր քաղաքում: Այնտեղ իսլամիստը դանակով հարձակվել էր ոստիկանի վրա:

Դեկտեմբերի 15-ին Agence France-Presse-ը հաղորդել էր, որ Ֆրանսիայում վերացվել է Սիրիա զինյալների տեղափոխման կապուղին, որտեղ նրանք պետք է իսլամիստների կողմում մասնակցեին զինված հակամարտությանը: Կալանավորվածների ստույգ թիվը չի նշվել:

Ֆրանսիայի ՆԳՆ նախարարությունը հայտնել է, որ երկրում զգալիորեն աճել է այն իսլամիստների թվաքանակը, ովքեր «ջիհադի» համար ուղևորվում են Սիրիա և Իրաք. ընթացիկ տարում այդ ցուցանիշն ավելացել է 80 տոկոսով:

Նոյեմբերին Փարիզի դատախազ Ֆրանսուա Մոլեն հայտնել էր, որ Ֆրանսիայի շուրջ 1130 քաղաքացիներ են մասնակցում իսլամիստական խմբավորումների գործունեությանը: Նաև նշվել էր, որ «Իսլամական պետություն» արմատական շարժման 16 զինյալների թվում, որոնք մեղսակից են ամերիկացի պատանդ Փիթեր Քեսիգի սպանությանը, երկու ֆրանսիացիներ են եղել, հաղորդել է ՏԱՍՍ գործակալությունը: